ஆஸ்திரேலியாவை பெனால்டி ஷூட் அவுட்டில் வீழ்த்தி எகிப்து வரலாற்று சாதனை: உலகக் கோப்பை வெற்றியை பாலஸ்தீன மக்களுக்கு அர்ப்பணித்தார் பயிற்சியாளர்!

ஆஸ்திரேலியாவை பெனால்டி ஷூட் அவுட்டில் வீழ்த்தி எகிப்து வரலாற்று சாதனை: உலகக் கோப்பை வெற்றியை பாலஸ்தீன மக்களுக்கு அர்ப்பணித்தார் பயிற்சியாளர்!

டலாஸ் (அமெரிக்கா): பிஃபா (FIFA) உலகக் கோப்பை கால்பந்து தொடரின் விறுவிறுப்பான ரவுண்ட் 32 நாக் அவுட் சுற்றில், ஆஸ்திரேலிய அணியை பெனால்டி ஷூட் அவுட் முறையில் 4-2 என்ற கோல் கணக்கில் வீழ்த்தி எகிப்து அணி ரவுண்ட் 16 சுற்றுக்குள் நுழைந்து புதிய வரலாறு படைத்துள்ளது. அமெரிக்காவின் டலாஸ் மைதானத்தில் நடைபெற்ற இந்த பரபரப்பான ஆட்டத்தின் முழு நேர முடிவில் இரு அணிகளும் 1-1 என சமநிலை வகித்ததை அடுத்து, வெற்றியாளரைத் தீர்மானிக்க பெனால்டி ஷூட் அவுட் முறை கடைபிடிக்கப்பட்டது.

பாலஸ்தீன மக்களுக்கு அர்ப்பணிப்பு: வெற்றிக்குப் பின்னர் செய்தியாளர்களிடம் பேசிய எகிப்து அணியின் பயிற்சியாளர் ஹொசாம் ஹசன், இந்த வரலாற்று வெற்றியைப் பாலஸ்தீன மக்களுக்கு நெகிழ்ச்சியுடன் அர்ப்பணித்தார். அவர் பேசுகையில், "என் இதயமும், ஆன்மாவும் எப்போதும் பாலஸ்தீன மக்களுடனேயே உள்ளன. ஒட்டுமொத்த அரபு மக்களுக்கும் பெருமை சேர்க்கும் வகையில் நாங்கள் இந்த வெற்றியைப் பதிவு செய்துள்ளோம். இந்த வெற்றியைப் பாலஸ்தீன மக்களுக்கு நான் மனதார அர்ப்பணிக்கிறேன்" என்று அமெரிக்க மண்ணில் நின்றபடி தைரியமாகத் தெரிவித்தார்.

ஆஸ்திரேலியாவின் தவறான வியூகம்: ஆட்டத்தின் 13-வது நிமிடத்தில் எகிப்து வீரர் எமாம் அஷூர் அதிரடியாக ஒரு கோல் அடித்து தனது அணிக்கு 1-0 என முன்னிலை தேடித்தந்தார். இது இந்த உலகக் கோப்பைத் தொடரின் 250-ஆவது கோலாகும். தொடர்ந்து நடைபெற்ற இரண்டாம் பாதியில், ஆஸ்திரேலிய அணியின் ஐடன் ஓ'நீல் அடித்த ஃப்ரீ-கிக்கைத் தடுக்க முயன்ற எகிப்து டிஃபெண்டர் முகமது ஹானி, எதிர்பாராதவிதமாகப் பந்தைத் தனது சொந்த கோல் வலைக்குள்ளேயே (Own Goal) திருப்பினார். இதனால் ஆட்டம் 1-1 என சமநிலையை எட்டியது.

ஆட்டம் முடிய 90 விநாடிகளே இருந்தபோது ஆஸ்திரேலிய அணி ஒரு தந்திரோபாய காய்நகர்த்தலாக, அதுவரை சிறப்பாகச் செயல்பட்ட கோல் கீப்பர் பேட்ரிக் பீச்சை மாற்றிவிட்டு, அனுபவ வீரர் மேட் ரயானைக் களமிறக்கியது. ஆனால், பெனால்டி ஷூட் அவுட்டில் எகிப்து வீரர்கள் அடித்த எந்தவொரு பந்தையும் அவரால் தடுக்க முடியாமல் போனது ஆஸ்திரேலியாவிற்குப் பின்னடைவாக அமைந்தது.

தவறிய வாய்ப்புகளும் சாலாவின் சாதுரியமும்: பெனால்டி ஷூட் அவுட்டின் போது ஆஸ்திரேலிய அணியின் ஹாரி சவுட்டர் அடித்த பந்து வானில் பறக்க, 18 வயது இளம் வீரர் லூகாஸ் ஹெரிங்டன் அடித்த பந்து கோல் கம்பத்தின் மேல் பகுதியில் (Crossbar) பட்டுத் தெறித்தது. மறுபுறம், எகிப்து அணி தனக்குக் கிடைத்த 4 வாய்ப்புகளையும் கச்சிதமாகக் கோலாக்கியது. குறிப்பாக, எகிப்தின் சூப்பர் ஸ்டார் முகமது சாலா மிக லாவகமாக அடித்த ‘சிப்’ (Chip) பெனால்டி கோல் ரசிகர்களைக் கட்டிப்போட்டது. உலகக் கோப்பை வரலாற்றில் எகிப்து அணி பெனால்டி ஷூட் அவுட்டில் பெற்ற முதல் வெற்றி இது என்பது குறிப்பிடத்தக்கது.

இரட்டை சுயகோல் சாதனை: இப்போட்டியில் சுயகோல் அடித்த எகிப்தின் முகமது ஹானி, இந்த ஒரே உலகக் கோப்பைத் தொடரில் அடிக்கும் 2-வது சுயகோல் இதுவாகும். இதன் மூலம் 1966-ஆம் ஆண்டுக்குப் பிறகு ஒரே உலகக் கோப்பையில் இரண்டு சுயகோல்கள் அடித்த 2-வது வீரர் என்ற மோசமான சாதனையை அவர் பதிவு செய்துள்ளார்.

போட்டிக்குப் பிறகு பேசிய முகமது சாலா, "இது எனது கடைசி உலகக் கோப்பைத் தொடராக இருக்கலாம் என்பதால் கூடுதல் பொறுப்புடன் விளையாடினேன். வீரர்களிடம் இது உங்கள் வாழ்வின் மிகப்பெரிய மேடை என்று கூறி உற்சாகப்படுத்தினேன். இந்த வரலாற்றுச் சிறப்புமிக்க வெற்றி ஒட்டுமொத்த அணிக்கும் பெருமை சேர்த்துள்ளது" என்று மகிழ்ச்சி பொங்கத் தெரிவித்துள்ளார்.