செம டஃப் கொடுத்த கேப் வெர்டே: கடைசி நேர ‘ஓன் கோல்’ அதிர்ஷ்டத்தால் தப்பித்து ரவுண்ட் 16-க்குள் நுழைந்தது அர்ஜெண்டினா!

செம டஃப் கொடுத்த கேப் வெர்டே: கடைசி நேர ‘ஓன் கோல்’ அதிர்ஷ்டத்தால் தப்பித்து ரவுண்ட் 16-க்குள் நுழைந்தது அர்ஜெண்டினா!

மியாமி (அமெரிக்கா): பிஃபா (FIFA) உலகக் கோப்பை கால்பந்து தொடரின் ரவுண்ட் 32 நாக் அவுட் சுற்றில், நடப்பு உலக சாம்பியனான அர்ஜெண்டினா அணிக்கு 67-வது இடத்தில் உள்ள கேப் வெர்டே (Cape Verde) அணி மரண பயத்தைக் காட்டியுள்ளது. மியாமி மைதானத்தில் நடைபெற்ற இந்த பரபரப்பான ஆட்டத்தில் கூடுதல் நேரம் வரை போராடிய அர்ஜெண்டினா, கடைசி நேரத்தில் கிடைத்த 'சுய கோல்' (Own Goal) அதிர்ஷ்டத்தால் 3-2 என்ற கோல் கணக்கில் தப்பிப் பிழைத்து ரவுண்ட் 16 சுற்றுக்கு முன்னேறியுள்ளது.

உலகத் தரவரிசையில் முதலிடத்தில் இருக்கும் அர்ஜெண்டினாவும், 67-ஆவது இடத்தில் இருக்கும் கேப் வெர்டே அணியும் மோதிய இந்த ஆட்டம் உலகக் கோப்பை வரலாற்றின் மிகப்பெரிய அதிர்ச்சித் தோல்வியாக அர்ஜெண்டினாவிற்கு மாறவிருந்த நிலையில், ‘கிரேட் எஸ்கேப்’ ஆகி அர்ஜெண்டினா தப்பித்துக் கொண்டது.

மெஸ்ஸியின் வரலாற்றுச் சாதனை: ஆட்டத்தின் 29-வது நிமிடத்தில் அர்ஜெண்டினாவின் கேப்டன் லியோனல் மெஸ்ஸி ஒரு அற்புதம் நிகழ்த்தினார். லிசாண்ட்ரோ மார்டினஸ் கொடுத்த லாங் பாஸ் பந்தை, மெஸ்ஸி தனது இடது காலின் வெளிப்புறத்தால் அசாத்தியமாகக் கட்டுப்படுத்தி, முன்னேறி வந்த கேப் வெர்டே கோல்கீப்பர் வோசின்ஹாவை ஏமாற்றி அபார கோல் அடித்தார். இதன் மூலம் உலகக் கோப்பை வரலாற்றில் தொடர்ந்து 8 போட்டிகளில் கோல் அடித்த முதல் வீரர் என்ற உலக சாதனையை மெஸ்ஸி படைத்தார்.

இருப்பினும், கேப் வெர்டே அணி அசரவில்லை. ஆட்டத்தின் 59-வது நிமிடத்தில் அந்த அணியின் டெராய் டுவார்டே துல்லியமான ஷாட் மூலம் கோல் அடித்து 1-1 என ஆட்டத்தைச் சமன் செய்தார். இதனால் முழு நேர முடிவில் ஆட்டம் சமநிலையானதால், போட்டி கூடுதல் நேரத்திற்கு (Extra Time) நகர்ந்தது.

விறுவிறுப்பான கூடுதல் நேரம்: கூடுதல் நேரம் தொடங்கிய சில நிமிடங்களிலேயே மெஸ்ஸியின் கார்னர் கிக் பாஸைப் பயன்படுத்தி, லிசாண்ட்ரோ மார்டினஸ் ஒரு பவர்புல் ஷாட் மூலம் கோல் அடித்து அர்ஜெண்டினாவை மீண்டும் 2-1 என முன்னிலைக்குக் கொண்டு வந்தார். ஆனால், விடாக்கண்டனான கேப் வெர்டே அணியின் சிட்னி லோப்ஸ் கப்ரால், ஆட்டத்தின் 103-வது நிமிடத்தில் அர்ஜெண்டினாவின் தற்காப்பு அரணைத் துளைத்து ஒரு அற்புதம் வாய்ந்த 'கர்லிங்' (Curling) ஷாட் மூலம் கோல் அடித்து 2-2 என மீண்டும் சமநிலையை ஏற்படுத்தி அதிர்ச்சியளித்தார்.

அர்ஜெண்டினாவைக் காத்த சுயகோல்: போட்டி பெனால்டி ஷூட் அவுட்டை நோக்கி நகர்ந்து கொண்டிருந்த வேளையில், ஆட்டத்தின் 111-வது நிமிடத்தில் மெஸ்ஸி அடித்த ஃப்ரீ-கிக் (Free-kick) பந்தை அர்ஜெண்டினா வீரர் கிறிஸ்டியன் ரோமெரோ முட்ட முயன்றார். அப்போது அதைத் தடுக்க முயன்ற கேப் வெர்டே டிஃபெண்டர் டினேய் போர்ஜஸ், துரதிர்ஷ்டவசமாகப் பந்தைத் தனது சொந்த கோல் வலையிலேயே தள்ளினார் (Own Goal). இந்த ஒரு சுயகோல் தான் அர்ஜெண்டினாவின் வெற்றிக் கோலாக (3-2) அமைந்தது. ஆட்டத்தின் இறுதி நிமிடங்களில் கேப் வெர்டே வீரர்கள் அடித்த இரண்டு ஆபத்தான கோல் முயற்சிகளை அர்ஜெண்டினா கோல்கீப்பர் எமிலியானோ மார்ட்டினேஸ் சாதுரியமாகத் தடுத்து அணியின் வெற்றியை உறுதி செய்தார்.

கோல்டன் பூட் பந்தயத்தில் மெஸ்ஸி முதலிடம்: இந்த உலகக் கோப்பையில் மெஸ்ஸி இதுவரை 7 கோல்களை அடித்து, 6 கோல்களுடன் இருக்கும் கிலியன் எம்பாப்பேவை முந்தி 'கோல்டன் பூட்' (Golden Boot) பந்தயத்தில் முதலிடத்தில் உள்ளார். மேலும், இது மெஸ்ஸியின் 30-ஆவது உலகக் கோப்பை போட்டியாகும். இதன் மூலம் ஆண்கள் உலகக் கோப்பை வரலாற்றில் அதிக போட்டிகளில் விளையாடிய வீரர் என்ற தனது சொந்த சாதனையை அவர் மேலும் நீட்டித்துள்ளார். இப்பட்டியலில் கிறிஸ்டியானோ ரொனால்டோ 26 போட்டிகளுடன் இரண்டாம் இடத்தில் உள்ளார் என்பது குறிப்பிடத்தக்கது.