இந்தியா - ஜப்பான் இடையே முக்கிய ஒப்பந்தங்கள் கையெழுத்து: ரூ.35,000 கோடியில் பிரம்மாண்ட கார் தொழிற்சாலை தொடக்கம்!
புதுடெல்லி: இந்தியா மற்றும் ஜப்பான் நாடுகளுக்கு இடையேயான வருடாந்திர மாநாடு நேற்று டெல்லியில் கோலாகலமாகத் தொடங்கியது. இதில் பங்கேற்பதற்காக 3 நாள் அரசுமுறைப் பயணமாக இந்தியா வந்துள்ள ஜப்பானின் முதல் பெண் பிரதமரான சனே டகாய்ச்சிக்கு, குடியரசுத் தலைவர் மாளிகையில் சிவப்புக் கம்பள வரவேற்பு அளிக்கப்பட்டது. இதனைத் தொடர்ந்து, டெல்லி ஹைதராபாத் இல்லத்தில் பிரதமர் நரேந்திர மோடியும், ஜப்பான் பிரதமர் சனே டகாய்ச்சியும் அதிகாரப்பூர்வமாகச் சந்தித்துப் பேசினர். இச்சந்திப்பின் போது, இரு நாடுகளின் உறவை அடுத்த கட்டத்திற்கு எடுத்துச் செல்லும் வகையில் பாதுகாப்பு, வர்த்தகம், பேட்டரி, பசுமை ஹைட்ரஜன், அணுசக்தி, கப்பல் கட்டுமானம் உள்ளிட்ட பல்வேறு முக்கியத் துறைகளில் வரலாற்றுச் சிறப்புமிக்க ஒப்பந்தங்கள் கையெழுத்தாயின.
இந்த மாநாட்டின் முக்கிய அங்கமாக, ஹரியானா மாநிலம் கார்கோடாவில் சுமார் 800 ஏக்கர் பரப்பளவில், ரூ.35,000 கோடி முதலீட்டில் அமைக்கப்பட்டுள்ள மாருதி சுசூகி நிறுவனத்தின் புதிய கார் உற்பத்தித் தொழிற்சாலையை இரு பிரதமர்களும் நேற்று மாலை காணொலி வாயிலாகத் தொடங்கி வைத்தனர். உலகின் மிகப்பெரிய கார் தொழிற்சாலைகளில் ஒன்றாகக் கருதப்படும் இந்த ஆலையில், முதற்கட்டமாக ஆண்டுக்கு 5 லட்சம் கார்கள் உற்பத்தி செய்யப்பட உள்ளன. இது படிப்படியாக 10 லட்சமாக உயர்த்தப்படும். மேலும், 'இந்தியாவில் தயாரிப்போம்' திட்டத்தின்கீழ் போர்க்கப்பல்களுக்குத் தேவையான ரேடார்களில் சிக்காத சிறப்பு ஆன்டெனாக்களைத் தயாரிக்கவும், கச்சா எண்ணெய் கையிருப்பை அதிகரிக்க ஜப்பான் தொழில்நுட்ப உதவிகளை வழங்கவும் இரு நாடுகளும் சம்மதம் தெரிவித்துள்ளன.
கூட்டுப் பொருளாதார மன்றக் கூட்டத்தில் பேசிய ஜப்பான் பிரதமர் சனே டகாய்ச்சி, "மும்பை - அகமதாபாத் இடையே 2027-ஆம் ஆண்டில் புல்லட் ரயில் சேவையைத் தொடங்க இந்திய அரசு திட்டமிட்டுள்ளது. இதற்குத் தேவையான அனைத்து உதவிகளையும் ஜப்பான் வழங்கும். இந்த வழித்தடத்தில் மணிக்கு 320 முதல் 400 கி.மீ. வேகத்தில் செல்லக்கூடிய ஜப்பானின் அடுத்த தலைமுறை புல்லட் ரயிலான 'இ-10 ஷிங்கன்சென்' அறிமுகம் செய்யப்படும்" என்று அறிவித்தார். இதன் மூலம் மும்பையில் இருந்து வெறும் 2 மணி நேரத்தில் அகமதாபாத் செல்ல முடியும். இதுமட்டுமின்றி, வர்த்தகத்தை எளிதாக்கும் வகையில் டாலருக்கு மாற்றாக, இந்திய ரூபாய் மற்றும் ஜப்பானிய 'யென்' ஆகிய உள்ளூர் கரன்சிகளிலேயே நேரடியாக வணிகம் மேற்கொள்ளும் திட்டத்தை முழுமையாகச் செயல்படுத்தவும் இரு நாடுகளும் தீவிரம் காட்டி வருகின்றன.
இம்மாநாட்டில் இரு தலைவர்களுக்கிடையே நிலவிய நட்பு ரீதியான உறவு அனைவரையும் நெகிழ்ச்சியில் ஆழ்த்தியது. ஜப்பான் பிரதமர் டகாய்ச்சியைப் பாராட்டிப் பேசிய பிரதமர் மோடி, "அவர் ஜப்பானின் முதல் பெண் பிரதமர் மட்டுமல்ல, எனது அழகிய இளம் தங்கையும் ஆவார்" என்று குறிப்பிட்டார். இதற்கு நெகிழ்ச்சியுடன் பதிலளித்த ஜப்பான் பிரதமர், "பிரதமர் மோடி என்னை தங்கை என்று அழைத்து உறவு பாராட்டியுள்ளார். அவர் எனது அண்ணன், நாங்கள் இருவரும் அண்ணன் - தங்கையாக இணைந்து செயல்படுவோம்" என்று மனமுருகக் கூறினார். இம்மாநாட்டின் மூலம் இந்தியா - ஜப்பான் இடையேயான பாதுகாப்பு மற்றும் பொருளாதார உறவுகள் புதிய உச்சத்தைத் தொட்டுள்ளதாக அரசியல் வல்லுநர்கள் கருதுகின்றனர்.
AthibAn Tv