2 கோல்கள் பின்னிலையிலிருந்து நம்ப முடியா எழுச்சி! - சர்ச்சை கோலால் செனெகலை வீழ்த்தியது பெல்ஜியம்
சியாட்டில: ஃபிபா (FIFA) உலகக்கோப்பை கால்பந்து தொடரின் ரவுண்ட் 32 சுற்றில், செனெகல் அணிக்கு எதிரான ஆட்டத்தில் பெல்ஜியம் அணி 2 கோல்கள் பின்னிலையிலிருந்து மீண்டெழுந்து 3-2 என்ற கோல் கணக்கில் த்ரில் வெற்றி பெற்றது. சியாட்டிலில் உள்ள லூமென் ஃபீல்ட் மைதானத்தில் நடைபெற்ற இந்த பரபரப்பான ஆட்டத்தின் முதல் பாதியில் செனெகல் அணி ஆதிக்கம் செலுத்தியது. ஆட்டத்தின் 25-வது நிமிடத்தில் ஹபீப் டியாராவும், இரண்டாவது பாதி தொடங்கிய 6-வது நிமிடத்தில் இஸ்மாயிலா சாரும் அபாரமாக கோல் அடித்து செனெகல் அணியை 2-0 என வலுவான முன்னிலைப் பெறச் செய்தனர். ஒருகட்டத்தில் பெல்ஜியத்தின் நட்சத்திர வீரர்கள் கெவின் டி ப்ரூய்ன் மற்றும் ஜெர்மி டோகு ஆகியோர் 56-வது நிமிடத்தில் வெளியேற்றப்பட்டதால், பெல்ஜியத்தின் உலகக்கோப்பை கனவு இத்துடன் முடிந்தது என்றே பலரும் கருதினர்.
ஆனால், ஆட்டத்தின் இறுதிக்கட்டத்தில் பெல்ஜியம் அணி யாரும் எதிர்பாராத அசாத்திய மீள் எழுச்சியைக் காட்டியது. ஆட்டத்தின் வழக்கமான நேரம் முடிய 4 நிமிடங்கள் மட்டுமே இருந்தபோது, மாற்று வீரராகக் களம் புகுந்த ரோமெலு லுக்காகு பெல்ஜியத்தின் முதல் கோலை அடித்து நம்பிக்கையளித்தார். அதனைத் தொடர்ந்து அடுத்த 2 நிமிடங்கள் 39 வினாடிகளுக்குள் லியாண்ட்ரோ ட்ரோசார்டின் கிராஸைப் பயன்படுத்தி, கேப்டன் யூரி டீலெமன்ஸ் தலையால் முட்டி இரண்டாவது கோலை அடிக்க, ஆட்டம் 2-2 என சமநிலையை எட்டியது. இதனால் ஆட்டம் கூடுதல் நேரத்திற்கு (Extra Time) நகர்ந்தது.
கூடுதல் நேரத்தின் இறுதிப் பகுதியில், ஆட்டத்தின் 124-வது நிமிடத்தில் பெல்ஜியத்திற்குச் சாதகமாக நடுவர் ஒரு பெனால்டி வாய்ப்பை வழங்கினார். சுமார் 7 நிமிடங்கள் நீடித்த வி.ஏ.ஆர் (VAR) வீடியோ ரிவியூ பரிசீலனைக்குப் பிறகு, கேப்டன் டீலெமன்ஸ் அந்த பெனால்டியை வெற்றிகரமாகக் கோலாக மாற்றி உலகக் கோப்பை வரலாற்றிலேயே மிகத் தாமதமான கோலைப் பதிவு செய்து பெல்ஜியத்தை அடுத்த சுற்றுக்கு அழைத்துச் சென்றார். ஏற்கனவே கடந்த ஜனவரி ஆப்பிரிக்க கோப்பையிலும் பெனால்டி தீர்ப்பால் கோப்பையை இழந்த செனெகல் அணிக்கு, இம்முறையும் வி.ஏ.ஆர் தொழில்நுட்பத்தின் தாமதமான மற்றும் சர்ச்சைக்குரிய பெனால்டி தீர்ப்பு பெரும் ஏமாற்றத்தை அளித்துள்ளது. இந்த சர்ச்சை ஒருபுறமிருக்க, 2 கோல்கள் பின்னிலையிலிருந்து பெல்ஜியம் பெற்ற இந்த எழுச்சிமிகு வெற்றி கால்பந்து வரலாற்றில் நீண்ட காலம் பேசப்படும்.
AthibAn Tv