பரந்தூர் விமான நிலையப் பணிகள் தற்காலிக நிறுத்தம்: 13 கிராமங்களில் நிலம் விற்க, வாங்க இன்னும் நீடிக்கும் தடை - பொதுமக்கள் கோரிக்கை!

பரந்தூர் விமான நிலையப் பணிகள் தற்காலிக நிறுத்தம்: 13 கிராமங்களில் நிலம் விற்க, வாங்க இன்னும் நீடிக்கும் தடை - பொதுமக்கள் கோரிக்கை!

காஞ்சிபுரம்: காஞ்சிபுரம் மாவட்டம் பரந்தூரில் அமையவிருந்த பசுமைவழி பன்னாட்டு விமான நிலையத் திட்டப் பணிகள் தற்காலிகமாக நிறுத்தி வைக்கப்பட்டிருந்தாலும், அதுதொடர்பான 13 கிராமங்களில் நிலம் வாங்க மற்றும் விற்பனை செய்வதற்கான தடை இன்னும் நீடிப்பதாக அப்பகுதி மக்கள் கவலை தெரிவித்துள்ளனர். இத்திட்டத்தை முழுமையாக ரத்து செய்து முறையான அரசாணையை வெளியிட வேண்டும் என்றும், நிலப் பரிமாற்றங்களுக்கான தடைகளை உடனடியாக நீக்க வேண்டும் என்றும் அவர்கள் அரசை வலியுறுத்தியுள்ளனர்.

முந்தைய திமுக அரசும், மத்திய அரசும் இணைந்து காஞ்சிபுரம் மாவட்டம் பரந்தூரில் சுமார் 27,400 கோடி ரூபாய் மதிப்பீட்டில், 5,746 ஏக்கர் பரப்பளவில் புதிய பசுமைவழி பன்னாட்டு விமான நிலையம் அமைக்கத் திட்டமிட்டிருந்தன. இதற்காக ஏகனாபுரம் உள்ளிட்ட 13 கிராமங்களில் உள்ள விவசாய விளைநிலங்கள், நீர்நிலைகள் மற்றும் குடியிருப்புகளைக் கையகப்படுத்தும் பணிகள் தீவிரமாக நடைபெற்று வந்தன. குறிப்பாக, ஏகனாபுரம் கிராமம் ஒட்டுமொத்தமாக இத்திட்டத்திற்காகக் குறிவைக்கப்பட்டதால், தங்களின் வாழ்வாதாரமும் கிராமமும் முற்றிலும் அழிந்துவிடும் என்று அஞ்சி, அப்பகுதி மக்கள் கடந்த 1,400 நாட்களுக்கும் மேலாகத் தொடர் போராட்டங்களை நடத்தி வந்தனர்.

ஆட்சி மாற்றமும் தற்போதைய நிலையும்: இந்நிலையில், தமிழக வெற்றிக் கழகத்தின் தலைவர் விஜய் தமிழக முதல்வராகப் பொறுப்பேற்ற பிறகு, இத்திட்டத்திற்கான நிலம் கையகப்படுத்தும் பணிகள் தற்காலிகமாக நிறுத்தி வைக்கப்பட்டன. இதற்காக உருவாக்கப்பட்டிருந்த சிறப்பு மாவட்ட வருவாய் அலுவலகங்களில் விமான நிலையத் திட்டத்திற்கான நில அளவை போன்ற களப்பணிகள் நிறுத்தப்பட்டு, தற்போது நிர்வாக ரீதியிலான அலுவலகப் பணிகள் மற்றும் ஆவணப் பரிசீலனைகள் மட்டுமே நடந்து வருகின்றன. இதுவரை சுமார் 1,700 ஏக்கர் நிலம் கையகப்படுத்தப்பட்டுள்ளது. பணிகள் நிறுத்தப்பட்டதால் ஏகனாபுரம் மற்றும் சுற்றுவட்டாரப் பகுதி விவசாயிகள் மகிழ்ச்சி அடைந்துள்ளனர். அங்குப் போராட்டங்கள் எதுவும் நடைபெறாததால், பாதுகாப்புக்காக அமைக்கப்பட்டிருந்த புறக்காவல் நிலையங்கள் கூட தற்போது மூடி வைக்கப்பட்டுள்ளன.

இதுகுறித்து, பரந்தூர் விமான நிலைய எதிர்ப்புப் போராட்டக் குழுவின் செய்தித் தொடர்பாளர் ஜனார்த்தனன் கூறும்போது, "தமிழக வெற்றிக் கழக அரசு பொறுப்பேற்ற பிறகு பரந்தூர் விமான நிலையத் திட்டப் பணிகள் அனைத்தும் தற்காலிகமாக நிறுத்தப்பட்டுள்ளது எங்களுக்குப் பெருமகிழ்ச்சி அளிக்கிறது. இதேபோல், இத்திட்டத்தை முற்றிலும் ரத்து செய்து முறையான அரசாணை வெளியிட்டால் மக்கள் இன்னும் நிம்மதி அடைவார்கள்" என்றார்.

சரிவைச் சந்திக்கும் ரியல் எஸ்டேட் துறை: விமான நிலையத் திட்ட அறிவிப்பு வெளியாவதற்கு முன்பு பரந்தூர் சுற்றுவட்டாரக் கிராமங்களில் ஒரு சென்ட் நிலம் வெறும் 5,000 ரூபாய்க்கு மட்டுமே விற்கப்பட்டது. ஆனால், திட்டம் உறுதியானவுடன் வெளிமாவட்ட முதலீட்டாளர்கள் மற்றும் ரியல் எஸ்டேட் நிறுவனங்கள் நிலங்களை வாங்கியதால் நிலத்தின் மதிப்பு ஒரு சென்ட் 5 லட்சம் ரூபாய் வரை எகிறியது. அரசு தரப்பிலேயே நில இழப்பீட்டுத் தொகையாகப் பரந்தூரில் 68 ஆயிரமும், ஏகனாபுரத்தில் 60 ஆயிரமும் விலை நிர்ணயிக்கப்பட்டது. ஆனால், தற்போது ஆட்சி மாற்றத்துக்குப் பின் இத்திட்டம் கைவிடப்பட வாய்ப்புள்ளதாகப் பரவும் தகவல்களால், ரியல் எஸ்டேட் துறையில் நிலத்தின் மதிப்பு 30 சதவீதம் வரை சரிந்துள்ளது. விலை சரிந்தாலும் முதலீட்டாளர்கள் நிலங்களை வாங்கத் தயக்கம் காட்டுகின்றனர். இத்திட்டம் முழுமையாக ரத்து செய்யப்பட்டு அரசாணை வெளியானால், நில மதிப்பு மேலும் 50 சதவீதம் வீழ்ச்சி அடையலாம் என்று ரியல் எஸ்டேட் அதிபர்கள் அஞ்சுகின்றனர்.

உள்கட்டமைப்பு வசதிகளின் நிலை என்ன? இத்திட்டத்தை முதன்மைப்படுத்திப் பரந்தூர் வழியாகச் செல்லும் வகையில் சென்னை - பெங்களூர் விரைவு வழிச்சாலை உருவாக்கப்பட்டுள்ளது. ஏற்கனவே காஞ்சிபுரம் வழியாக 6 வழிச்சாலை பயன்பாட்டில் இருக்கும்போதே இந்தக் கூடுதல் விரைவுச்சாலை அமைக்கப்பட்டது. மேலும், இந்த விமான நிலைய உள்கட்டமைப்பை மையமாக வைத்து பூந்தமல்லி வரை இருந்த மெட்ரோ ரயில் திட்டமும் பரந்தூர் வழியாகக் காஞ்சிபுரம் வரை நீட்டிக்க ஒப்புதல் அளிக்கப்பட்டிருந்தது.

இத்திட்டத்தின் தற்போதைய நிலை குறித்து அரசு உயர் அலுவலர்கள் சிலர் கூறும்போது, "விமான நிலையம் நிறுத்தப்பட்டால், இவ்வளவு கோடி மதிப்பீட்டில் உருவாக்கப்பட்ட சென்னை - பெங்களூர் விரைவுச்சாலை மற்றும் உள்கட்டமைப்புகளின் பயன்பாடு என்னவாகும்? காஞ்சிபுரம் வரையிலான மெட்ரோ ரயில் திட்டத்தின் நிலை என்ன?" என்று கேள்வி எழுப்புகின்றனர். எனவே, பரந்தூர் விமான நிலையத் திட்டம் கைவிடப்பட்டாலும், காஞ்சிபுரம் மாவட்டத்தின் ஒட்டுமொத்த போக்குவரத்து மற்றும் வணிக வளர்ச்சியைத் தொலைநோக்குப் பார்வையோடு அணுகி, இந்த மெட்ரோ ரயில் மற்றும் சாலை உள்கட்டமைப்புத் திட்டங்களை அரசு எக்காரணம் கொண்டும் நிறுத்தாமல் தொடர்ந்து செயல்படுத்த வேண்டும் என்று காஞ்சிபுரம் மாவட்ட மக்கள் கோரிக்கை விடுத்துள்ளனர்.