“வரும் 10-ம் தேதி முதல்வர் விஜய் கரூர் பயணம்!”: மாமல்லபுரம் இணைப்பு விழாவில் தவெக அமைச்சர் ஆனந்த் அதிரடி அறிவிப்பு
மாமல்லபுரம்: தமிழக முதல்வர் சி.ஜே.விஜய் வரும் ஜூலை 10-ம் தேதி கரூர் மாவட்டத்திற்குப் பயணம் மேற்கொள்ள இருப்பதாகத் தமிழக வெற்றிக் கழகத்தின் பொதுச்செயலாளரும் அமைச்சருமான ஆனந்த் அதிகாரப்பூர்வமாக அறிவித்துள்ளார். சென்னையை அடுத்த மாமல்லபுரத்தில் இன்று நடைபெற்ற அதிமுக முன்னாள் அமைச்சர்கள் சி.விஜயபாஸ்கர், எம்.ஆர்.விஜயபாஸ்கர் மற்றும் அவர்களின் ஆதரவாளர்கள் தவெகவில் இணையும் மாபெரும் விழாவில் கலந்துகொண்டு பேசியபோதே அவர் இந்த முக்கிய அறிவிப்பை வெளியிட்டார். விழாவில் புதிய நிர்வாகிகளை வரவேற்றுப் பேசிய அவர், "அதிமுகவிலிருந்து விலகி தவெகவில் இணைந்துள்ள நீங்கள் அனைவரும் இனி எங்கள் குடும்பத்தைச் சேர்ந்தவர்கள்; கட்சித் தலைவர் விஜய்யின் உண்மையான தோழர்கள். உங்களுக்கு ஒரு பிரச்சினை என்றால் தவெக எப்போதும் உங்களோடு அரணாக இருக்கும்" என்று உறுதியளித்தார்.
தனது உரையில் தவெகவின் தேர்தல் வெற்றி குறித்தும், தலைவர் விஜய்யின் ஆளுமை குறித்தும் நெகிழ்ச்சியுடன் பகிர்ந்துகொண்ட அமைச்சர் ஆனந்த், "விஜய்யை நம்பி வந்தவர்கள் யாரும் கெட்டதாக வரலாறு இல்லை, வாழ்ந்ததாகத்தான் வரலாறு உள்ளது. தியாகராய நகர் (தி.நகர்) தொகுதியில் நான் வெறும் நான்கு நாட்கள் மட்டுமே பிரச்சாரம் செய்திருந்தாலும், மக்கள் எனக்காக வாக்களிக்கவில்லை; முழுக்க முழுக்க தலைவர் விஜய்க்காகத்தான் வாக்களித்து என்னை அமைச்சராக்கியுள்ளனர். நடந்து முடிந்த பொதுத்தேர்தலில் போட்டியிட்ட 233 தொகுதிகளிலும் டெபாசிட் இழக்காத ஒரே கட்சி தவெக மட்டும்தான்" என்று பெருமிதம் தெரிவித்தார். மேலும், அன்று புரட்சித் தலைவர் எம்.ஜி.ஆர் காட்டிய பாதையில்தான் இன்று தவெக பயணிப்பதாகவும், கட்சியில் இணையும் முன்னாள் அமைச்சர்கள், மாவட்ட நிர்வாகிகள் முதல் கிளைக்கழக நிர்வாகிகள் வரை அனைவருக்கும் உரிய மரியாதை வழங்கப்பட வேண்டும் என்பதில் முதல்வர் விஜய் உறுதியாக இருப்பதாகவும் குறிப்பிட்டார்.
மேலும், வரவிருக்கும் உள்ளாட்சித் தேர்தலை எதிர்கொள்வது குறித்துப் பேசிய அமைச்சர் ஆனந்த், "அதிமுகவிலிருந்து இங்கு வந்துள்ளவர்களில் 75 விழுக்காட்டினர் இளைஞர்களாக இருக்கிறீர்கள். நேற்றுதான் கட்சியில் இணைந்தீர்கள் என்று உங்களை ஒருபோதும் தவெக பிரித்துப் பார்க்காது; உங்கள் பகுதிக்கான அனைத்து கோரிக்கைகளும் நிச்சயம் நிறைவேற்றப்படும். தவெகவின் பழைய நிர்வாகிகளோடு நீங்கள் அனைவரும் ஒன்றிணைந்து செயல்பட வேண்டும். வரக்கூடிய உள்ளாட்சித் தேர்தலில் அனைத்துப் பஞ்சாயத்து இடங்களிலும் தவெகவினரை நாம் பெருவாரியான வாக்குகள் வித்தியாசத்தில் வெற்றி பெறச் செய்ய வேண்டும். உள்ளாட்சி அமைப்புகளில் நாம் வென்றால்தான் மக்களுக்கான சேவைகளை இன்னும் சிறப்பாகக் கொண்டு சேர்க்க முடியும்; அதற்கான முழு வாய்ப்புகளையும் தலைவர் விஜய் உங்களுக்கு வழங்குவார்" என்று தொண்டர்களிடையே எழுச்சியூட்டும் வகையில் பேசினார்.
AthibAn Tv