“இளைஞர்களின் கனவுகளைத் தவிடு பொடியாக்குவது தான் விஜய்யின் மாற்று அரசியலா?” - நயினார் நாகேந்திரன் காட்டமான கேள்வி!

“இளைஞர்களின் கனவுகளைத் தவிடு பொடியாக்குவது தான் விஜய்யின் மாற்று அரசியலா?” - நயினார் நாகேந்திரன் காட்டமான கேள்வி!

சென்னை:

“தமிழகத்தில் சட்டம் - ஒழுங்கு பிரச்சினைகள் நாளுக்கு நாள் அதிகரித்து வரும் வேளையில், இந்த ஆண்டுக்கான காவலர் நியமனத்தை அடுத்த ஆண்டுக்குத் தள்ளி வைப்பது லட்சக்கணக்கான இளைஞர்களின் கனவுகளைத் தவிடு பொடியாக்கும் செயலாகும்” என்று தமிழக பாஜக தலைவர் நயினார் நாகேந்திரன் தவெக அரசைக் கடுமையாகச் சாடியுள்ளார். தமிழக சீருடைப் பணியாளர் தேர்வு வாரியத்தின் இந்த அதிரடி அறிவிப்பிற்குத் தனது கண்டனத்தைப் பதிவு செய்துள்ள அவர், காவலர் நியமனத்தைத் தாமதப்படுத்துவது என்பது மாநிலத்தில் சட்டம் - ஒழுங்கு விவகாரத்தில் அரசு சமரசம் செய்துகொள்வதற்குச் சமம் என்று குற்றம் சாட்டியுள்ளார்.

வயது வரம்பு பாதிப்பும் காவலர்களின் பணிச்சுமையும்:

இது தொடர்பாக நயினார் நாகேந்திரன் தனது அதிகாரப்பூர்வ 'எக்ஸ்' (ட்விட்டர்) பக்கத்தில் வெளியிட்டுள்ள பதிவில், "அரசு வேலைக்காக உடலளவிலும், மனதளவிலும் இரவு பகலாகத் தங்களைத் தயார்படுத்தி வரும் இளைஞர்களின் வாழ்வாதாரத்தை இந்த அறிவிப்பு கேள்விக்குறியாக்கியுள்ளது. அரசின் இந்தத் தன்னிச்சையான நடவடிக்கையால், வயது வரம்பு கடந்துபோகும் சூழல் ஏற்பட்டு நூற்றுக்கணக்கான படித்த பட்டதாரிகள் காவலர் வேலைக்கான தகுதியை முழுமையாக இழக்கும் அபாயம் ஏற்பட்டுள்ளது" என்று சுட்டிக்காட்டியுள்ளார். மேலும், ஏற்கனவே ஆள் பற்றாக்குறையால் கடும் பணிச்சுமையில் தவிக்கும் தற்போதைய காவலர்களுக்கு, இந்த ஓராண்டுத் தள்ளிவைப்பு கூடுதல் பளுவை ஏற்படுத்தி அவர்களை கடுமையான மன உளைச்சலுக்குள் தள்ளும் என்றும் அவர் கவலை தெரிவித்துள்ளார்.

பதவி உயர்வு வழங்க முதலமைச்சருக்கு வலியுறுத்தல்:

காவலர் நியமனத்தை அடுத்த ஆண்டுக்கு ஒத்திவைக்கும் உத்தரவை உடனடியாகத் தவெக அரசு திரும்பப் பெற வேண்டும் என வலியுறுத்தியுள்ள நயினார் நாகேந்திரன், தமிழகக் காவல் நிலையங்களின் அனைத்துப் பிரிவுகளிலும் நிலவி வரும் பணியாளர் பற்றாக்குறையை நிவர்த்தி செய்ய முதலமைச்சர் விஜய் உடனடியாக நடவடிக்கை எடுக்க வேண்டும் எனக் கேட்டுக்கொண்டுள்ளார். இவற்றுடன், தமிழகக் காவல்துறையில் ஆய்வாளர்களாக (Inspectors) இருக்கும் பல அதிகாரிகள், துணைக் காவல் கண்காணிப்பாளர் (DSP) பதவி உயர்விற்குத் தகுதி பெற்றும் கூட, நீண்ட காலமாகப் பதவி உயர்வு கிடைக்காமல் காத்திருக்கும் அவல நிலை நீடிப்பதாகக் குறிப்பிட்ட அவர், அவர்களுக்கான நியாயமான பதவி உயர்வை விரைந்து வழங்கிடத் தமிழக அரசு முன்வர வேண்டும் என்றும் தனது பதிவின் வாயிலாக வலியுறுத்தியுள்ளார்.