“செந்தில் பாலாஜி சரணடைய வேண்டும்; ஸ்டாலின் பயத்தால் லண்டன் ஓடியுள்ளார்” - திமுக முன்னாள் அமைச்சர்களுக்கு அர்ஜுன் சம்பத் சவால்!
காரைக்குடி: "லஞ்ச, ஊழல் வழக்குகளில் சிக்கியுள்ள திமுகவின் முன்னாள் அமைச்சர்கள் சட்டத்திற்குப் பயந்து வெளிநாடுகளுக்கு ஓடி ஒளியாமல், தங்களை நீதிமன்றத்தில் நிரபராதி என நிரூபிக்க வேண்டும்" என்று இந்து மக்கள் கட்சியின் தலைவர் அர்ஜுன் சம்பத் காரைக்குடியில் இன்று செய்தியாளர்களிடம் சவால் விடுத்துள்ளார்.
சிவகங்கை மாவட்டம், காரைக்குடியில் நடைபெற்ற அக்கட்சியின் முக்கிய நிகழ்வுக்குப் பின் செய்தியாளர்களைச் சந்தித்த அர்ஜுன் சம்பத், பல்வேறு நடப்பு அரசியல் விவகாரங்கள் குறித்துப் பேசியதன் விரிவான விவரம்:
“திமுக முன்னாள் அமைச்சர்கள் ஓடி ஒளியக் கூடாது”:
திமுக தலைவர்கள் மற்றும் முன்னாள் அமைச்சர்கள் மீதான ஊழல் வழக்குகள் குறித்து அர்ஜுன் சம்பத் கடுமையான விமர்சனங்களை முன்வைத்தார்:
"திமுகவினருக்குச் சட்டத்தை எதிர்கொள்ளும் துணிச்சல் கிடையாது. முன்னாள் அமைச்சர் செந்தில் பாலாஜி உண்மையிலேயே நேர்மையானவராக இருந்தால், அவர் நீதிமன்றத்தில் உடனடியாகச் சரணடைய வேண்டும். அதேபோல், சாலைகளை அமைக்காமல் பல கோடி ரூபாய் ஊழல் செய்த புகாரில் சிக்கிய முன்னாள் அமைச்சர் எ.வ.வேலு, விசாரணைக்கு அஞ்சி சிங்கப்பூர் மருத்துவமனையில் போய் படுத்துக் கொண்டார்.
ஊழல் வழக்குகளில் சிக்கிய திமுக முன்னாள் அமைச்சர்கள் ஓடி ஒளியக் கூடாது. ஏன், தற்போதைய திமுக தலைவர் மு.க.ஸ்டாலின் கூட பயத்தின் காரணமாகத்தான் லண்டனுக்குச் சென்றுள்ளார் என்று நினைக்கிறேன். ஸ்டாலினின் பேரன் லண்டனில் வெவ்வேறு உலக மொழிகளில் படிக்கலாம்; ஆனால் தமிழ்நாட்டுப் பிள்ளைகள் மட்டும் பிற மொழிகளைப் படிக்கக் கூடாது என இவர்கள் இரட்டை வேடம் போடுகிறார்கள்."
“மதுக்கடைகளை விஜய்யால் மட்டுமே மூட முடியும்”:
தமிழகத்தில் போதைப்பொருள் புழக்கம் அதிகரித்துள்ளது குறித்துப் பேசிய அவர், தவெக தலைவர் விஜய்க்கு முக்கியக் கோரிக்கை ஒன்றையும் வைத்தார்:
"தமிழகத்தில் போதையை ஒழிக்க வேண்டும் என்றால் முதலில் அரசு மதுக்கடைகளை (டாஸ்மாக்) மூட வேண்டும். தமிழ்நாட்டில் திமுக மற்றும் அதிமுகவினர்தான் பெரும்பாலான சாராய ஆலைகளை நடத்துகின்றனர். ஆனால், தவெக தலைவர் விஜய் எவ்வித சாராய ஆலையையும் நடத்தவில்லை. அதனால், விஜய்யால் மட்டுமே ஆட்சிக்கு வரும்போது துணிச்சலாக மதுக்கடைகளை மூட முடியும். மதுக்கடையை நம்பித்தான் அரசு நடத்த முடியும் என்ற மூடநம்பிக்கையை இங்கிருக்கும் அரசியல்வாதிகள் திட்டமிட்டு விதைத்துள்ளனர்" என்றார்.
பணத்தைக் காப்பாற்றவே தவெக-வுக்குத் தாவுகிறார்கள்:
திமுக, அதிமுகவிலிருந்து முக்கியப் புள்ளிகள் தவெகவில் இணைவது குறித்துப் பேசிய அவர், "விஜய்யின் கொள்கை பிடித்து யாரும் அவரிடம் செல்லவில்லை; தங்களின் லஞ்சப் பணத்தையும் சொத்துக்களையும் காப்பாற்றிக் கொள்ளவே பிற கட்சியினர் தவெகவுக்குத் தாவுகின்றனர். இதுபோன்ற சுயநலவாதிகளை விஜய் தன் கட்சியில் ஊக்குவிக்கக் கூடாது" என எச்சரித்தார்.
மேலும், கம்யூனிஸ்டுகளின் தூண்டுதலின் பேரில் ஆளுநரைத் தரக்குறைவாக விமர்சிக்கும் அமைச்சர் நிர்மல் குமாரின் போக்கைக் கண்டித்த அவர், மத்திய அரசுடன் மோதல் போக்கைக் கடைப்பிடிக்க நினைக்கும் திமுகவின் தந்திரங்களுக்குத் தவெக அரசு துணைபோகக் கூடாது என்றும், மத்திய அரசுடன் ஒத்துழைத்துத் தமிழகத்திற்கு நல்ல திட்டங்களைக் கொண்டுவர வேண்டும் என்றும் கேட்டுக்கொண்டார்.
கரூரில் அரசு வேலை கொடுப்பது அதிகார துஷ்பிரயோகம்:
கரூரில் ஏற்பட்ட கூட்ட நெரிசல் விபத்தில் உயிரிழந்த 41 பேரின் குடும்பத்தினருக்குத் தற்போதைய அரசு வேலை வழங்கியதை அர்ஜுன் சம்பத் கடுமையாக எதிர்த்தார்:
"கரூரில் கூட்ட நெரிசலில் 41 பேர் உயிரிழந்த சம்பவத்தில் நீங்கள் நிரபராதியாகவே இருங்கள்; அல்லது உங்கள் மீது பழி சுமத்தப்பட்டதாகவே இருக்கட்டும். அதற்காகப் பாதிக்கப்பட்ட குடும்பங்களுக்கு உங்களது சொந்தக் கட்சி நிதியிலிருந்து உதவலாமே தவிர, தகுதி வாய்ந்த பிற இளைஞர்களின் வேலைவாய்ப்பைப் பறிக்கும் வகையில் அரசு வேலையைத் தூக்கிக் கொடுப்பது அதிகாரத்தைத் தவறாகப் பயன்படுத்தும் செயலாகும். மக்கள் வரிப்பணமான அரசுப் பணத்தை இதற்காகச் செலவழிப்பதை ஒருபோதும் ஏற்க முடியாது" என்றார்.
இந்துக்களுக்கு வாழ்த்து கூற வேண்டும்:
"கிறிஸ்தவ மதத்தினருக்கு மட்டும் முன்னுரிமை கொடுக்காமல், அரசு அனைத்து மதத்தினரையும் சமமாக நடத்த வேண்டும். திமுகவைப் போல இல்லாமல் தவெக அரசு இந்து பண்டிகைகளுக்கும் அதிகாரப்பூர்வ வாழ்த்துகளைத் தெரிவிக்க வேண்டும். அதேநேரம், இந்துக்களையும் பிரதமர் மோடியையும் அவதூறாகப் பேசும் திமுகவினர் மீது காவல்துறை கடுமையான நடவடிக்கை எடுத்து அவர்களைக் கைது செய்ய வேண்டும்" என்றும் அர்ஜுன் சம்பத் தனது பேட்டியில் வலியுறுத்தினார்.
AthibAn Tv