“அணு ஆயுதத் தாக்குதலையும் தாங்கும்!”: டெல்லியில் நாட்டின் முதல் நிலத்தடி ‘சிபிஆர்என்’ கட்டுப்பாட்டு மையம் அமைக்க மத்திய அரசு அதிரடி முடிவு!

“அணு ஆயுதத் தாக்குதலையும் தாங்கும்!”: டெல்லியில் நாட்டின் முதல் நிலத்தடி ‘சிபிஆர்என்’ கட்டுப்பாட்டு மையம் அமைக்க மத்திய அரசு அதிரடி முடிவு!

புதுடெல்லி: நாட்டின் தலைநகரான டெல்லியில் ரசாயனம், உயிரியல், கதிர்வீச்சு மற்றும் அணு ஆயுதத் தாக்குதல்கள் (CBRN) போன்ற மிக மோசமான அவசர நிலை ஏற்பட்டாலும், எவ்விதப் பாதிப்புமின்றி அரசு உடனடியாகச் செயல்படுவதை உறுதி செய்யப் பாதாளத்தில் (நிலத்துக்கு அடியில்) அதிநவீனக் கட்டுப்பாட்டு மையம் ஒன்றை அமைக்க மத்திய அரசு அதிரடி முடிவு செய்துள்ளது. "சிபிஆர்என்" (Chemical, Biological, Radiological and Nuclear - CBRN) எனப் பெயரிடப்பட்டுள்ள இந்த அதீதப் பாதுகாப்புப் பேரிடர் கட்டுப்பாட்டு மையத்தைத் டெல்லியில் உள்ள தீயணைப்புத்துறை தலைமை அலுவலகத்தின் கீழ் அமைக்கத் திட்டமிடப்பட்டு, இதற்கான அதிகாரப்பூர்வ டெண்டரும் தற்போது வெளியிடப்பட்டுள்ளது.

இது குறித்து டெல்லி தீயணைப்புத்துறையின் தலைமை அதிகாரி அபிலாஷ் மாலிக் செய்தியாளர்களிடம் விரிவான பேட்டி அளித்துள்ளார். அப்போது அவர் பேசுகையில், "யுத்த காலங்கள் அல்லது தீவிரவாதத் தாக்குதல்களின் போது ஏற்படும் அணு கதிர்வீச்சு பாதிப்பு போன்ற மிகக் கடுமையான சூழல்களிலும், நாட்டின் பல்வேறு அரசு பாதுகாப்பு முகமைகள் எவ்விதத் தடையுமின்றி ஒருங்கிணைந்து செயல்படுவதை உறுதி செய்யவும், அவசர நிலையின் போது இந்த மையத்தில் தங்கிப் பணியாற்றும் அதிகாரிகளைப் பாதுகாக்கவும் இந்த நிலத்தடி கட்டுப்பாட்டு மையம் மிக வலிமையாக உருவாக்கப்படுகிறது" என்று குறிப்பிட்டார்.

மேலும் இந்த மையத்தின் சிறப்பம்சங்கள் குறித்து விளக்கிய அதிகாரி, டெல்லி மாநகர வரலாற்றிலேயே இத்தகைய அணு ஆயுதத் தடுப்புக் கட்டுப்பாட்டு மையம் நிலத்துக்கு அடியில் அமைக்கப்படுவது இதுவே முதல் முறையாகும் என்றார். இங்கு அவசரப் பணியில் ஈடுபடும் அதிகாரிகள் மற்றும் மீட்புக் குழுவினர், எந்தவொரு கொடிய நச்சு வாயு அல்லது கதிர்வீச்சுத் தாக்குதலுக்குள்ளும் சிக்கிப் பாதிக்கப்படாத வகையில், முழுமையான பாதுகாப்பு கவசக் கட்டமைப்புடன் (Radiation-proof design) இந்த அதிநவீன பாதாள மையம் வடிவமைக்கப்பட உள்ளதாக அவர் பெருமிதத்துடன் தெரிவித்தார்.

தற்போது டெல்லியின் நேரு பிளேஸ், லட்சுமி நகர் மற்றும் ரோஹினி ஆகிய மூன்று முக்கிய இடங்களில் பேரிடர் மேலாண்மை மையங்கள் இயங்கி வருகின்றன. எதிர்காலத்தில் அமையவிருக்கும் இந்த சிபிஆர்என் (CBRN) கட்டுப்பாட்டு மையமானது, பேரிடர் காலங்களில் அந்த மூன்று மையங்களுடனும் அதிவேகத் தொழில்நுட்பத் தொடர்பில் இருந்து கொண்டு ஒருங்கிணைந்து செயல்படும். மேலும், டெல்லி தீயணைப்புத் துறையின் அவசரத் தேடுதல் மற்றும் மீட்புப் பணிகளின் போதும் இந்த மையம் முக்கிய வழிகாட்டியாகச் செயல்பட உள்ளது. இந்த பிரம்மாண்ட நிலத்தடி கட்டுப்பாட்டு மையத்தின் கட்டுமானப் பணிகள் அனைத்தும் திட்டமிட்டபடி அடுத்த 5 ஆண்டு காலத்திற்குள் முழுமையாக நிறைவடையும் என எதிர்பார்ப்பதாக அபிலாஷ் மாலிக் தனது பேட்டியில் தெரிவித்துள்ளார்.