“அரசியல் நாகரிகத்தையும் பண்பாட்டையும் பேண வேண்டும்” - அனிதா ராதாகிருஷ்ணன் கைது மற்றும் அமைச்சர் ஆதவ் அர்ஜுனா பேச்சுக்கு மு.வீரபாண்டியன் கண்டனம்!

“அரசியல் நாகரிகத்தையும் பண்பாட்டையும் பேண வேண்டும்” - அனிதா ராதாகிருஷ்ணன் கைது மற்றும் அமைச்சர் ஆதவ் அர்ஜுனா பேச்சுக்கு மு.வீரபாண்டியன் கண்டனம்!

சென்னை: "அரசியல் தளத்தில் நாகரிகத்தையும், உயர்ந்த பண்பாட்டையும் பேணிப் பாதுகாப்பதில் பொது வாழ்வில் உள்ள அனைவரும் அக்கறை காட்டுவது அவசியம்" என்று இந்திய கம்யூனிஸ்ட் கட்சியின் (CPI) தமிழ்நாடு மாநிலச் செயலாளர் மு.வீரபாண்டியன் வலியுறுத்தியுள்ளார். திமுக சட்டமன்ற உறுப்பினர் அனிதா ராதாகிருஷ்ணனின் பேச்சு, அவரது கைது நடவடிக்கை மற்றும் தமிழக அமைச்சர் ஆதவ் அர்ஜுனாவின் சர்ச்சை பேச்சு ஆகியவற்றை முன்வைத்து அவர் விடுத்துள்ள காரசாரமான அறிக்கை இதோ:

அனிதா ராதாகிருஷ்ணன் பேச்சுக்குக் கண்டனம்: மு.வீரபாண்டியன் வெளியிட்டுள்ள அறிக்கையில், "தூத்துக்குடி மாவட்டத்தில் நடைபெற்ற பொதுக்கூட்டம் ஒன்றில், முன்னாள் அமைச்சரும் தற்போதைய திமுக சட்டமன்ற உறுப்பினருமான அனிதா ஆர்.ராதாகிருஷ்ணன், தமிழக முதல்வரின் தனிப்பட்ட வாழ்க்கை குறித்து மிகவும் தரம் தாழ்ந்த முறையில் பேசியிருப்பது வன்மையான கண்டனத்திற்குரியது. அரசின் நடவடிக்கைகள் மற்றும் பிற அரசியல் கட்சிகளின் கொள்கை முடிவுகள் மீது கடுமையான விமர்சனங்களை முன்வைப்பதற்கும், அதனை எதிர்ப்பதற்கும் ஜனநாயகத்தில் அனைவருக்கும் முழு உரிமை உண்டு. அது ஆரோக்கியமான அரசியல் நடைமுறைகளை வலுப்படுத்தும்" என்று குறிப்பிட்டுள்ளார்.

பலவந்தக் கைது தவித்திருக்கலாம்: மேலும், தனிநபர் விமர்சனங்கள் குறித்துப் பேசிய அவர், "அரசியல் களத்தில் உள்ளவர்களின் தனிப்பட்ட வாழ்க்கை பிரச்சினைகளைப் பொதுவெளியில் தரம் தாழ்ந்து பேசுவது சட்ட அத்துமீறலாகும். அதன் மீது சட்டரீதியான நடவடிக்கை எடுப்பது அரசின் கடமை என்பதில் மாற்றுக் கருத்து இல்லை. எனினும், தற்போது சட்டமன்ற உறுப்பினர் பொறுப்பில் உள்ள ஒருவரை, காவல் துறையினர் நள்ளிரவில் பலவந்தமாகக் கைது செய்யும் அளவிற்கான தீவிரமான அச்சுறுத்தல் நடவடிக்கையைத் தவிர்த்திருக்க வேண்டும்" எனத் தவெக அரசின் கைது நடவடிக்கைக்கும் தனது அதிருப்தியைப் பதிவு செய்துள்ளார்.

அமைச்சர் ஆதவ் அர்ஜுனாவுக்கு அறிவுரை: அதேவேளையில், தமிழக வெற்றிக் கழக அரசைச் சேர்ந்த பொதுப்பணி மற்றும் விளையாட்டு மேம்பாட்டுத்துறை அமைச்சர் ஆதவ் அர்ஜுனாவின் பேச்சுக்கும் மு.வீரபாண்டியன் கண்டனம் தெரிவித்துள்ளார். "கரூர் சம்பவத்தைச் சுட்டிக்காட்டி, அதற்கு 'கணக்கு தீர்க்காமல் விடமாட்டோம்' என்று அமைச்சர் ஆதவ் அர்ஜுனா தனது கட்சி கூட்டத்தில் பேசியிருப்பது எவ்வகையிலும் ஏற்கத்தக்கதல்ல. வன்முறையைத் தூண்டும் விதமாகப் பேசுவது அவர் வகிக்கும் உன்னதமான அமைச்சர் பொறுப்புக்கு எவ்வித பெருமையையும் சேர்க்காது என்பதை அவர் கருத்தில் கொள்ள வேண்டும்" என்று சுட்டிக்காட்டியுள்ளார்.

இறுதியாக, தமிழ்நாட்டில் தற்போதைய அரசியல் சூழல் தனிநபர் மோதலாக மாறி வருவதைச் சுட்டிக்காட்டியுள்ள அவர், பொது வாழ்வில் இருக்கும் அனைத்துக் கட்சித் தலைவர்களும், அமைச்சர்களும் தங்களது வார்த்தைகளில் நாகரிகத்தையும், உயர்ந்த பண்பாட்டையும் கடைபிடிக்க வேண்டும் என்பதை இந்தியக் கம்யூனிஸ்டு கட்சியின் தமிழ்நாடு மாநில செயற்குழு சார்பில் மிகக் கடுமையான தொனியில் வலியுறுத்தியுள்ளார்.