பொறியியல் படிப்புக்கான தரவரிசைப் பட்டியல் இன்று வெளியீடு: கலந்தாய்வு தேதிகளும் அறிவிக்கப்படுகின்றன!

பொறியியல் படிப்புக்கான தரவரிசைப் பட்டியல் இன்று வெளியீடு: கலந்தாய்வு தேதிகளும் அறிவிக்கப்படுகின்றன!

சென்னை: தமிழகத்தில் உள்ள பொறியியல் கல்லூரிகளுக்கான நடப்பு கல்வி ஆண்டின் (2026-27) அரசு ஒதுக்கீட்டு இடங்களுக்கான தரவரிசைப் பட்டியல் (TNEA Rank List) இன்று (ஜூலை 1) வெளியிடப்படுகிறது. சென்னை கிண்டியில் உள்ள மாநில தொழில்நுட்பக் கல்வி இயக்குநர் அலுவலகத்தில், இன்று காலை 10 மணியளவில் உயர் கல்வித்துறை அமைச்சர் விஸ்வநாதன் இந்தத் தரவரிசைப் பட்டியலை முறைப்படி வெளியிடுகிறார்.

2.23 லட்சம் மாணவர்கள் எதிர்பார்ப்பு

தமிழகத்தில் அண்ணா பல்கலைக்கழகத் துறைசார் கல்லூரிகள், அரசு மற்றும் அரசு உதவிபெறும் பொறியியல் கல்லூரிகள், தனியார் சுயநிதிக் கல்லூரிகள் என 440-க்கும் மேற்பட்ட பொறியியல் கல்லூரிகள் இயங்கி வருகின்றன. இவற்றில் உள்ள அரசு ஒதுக்கீட்டுப் பொறியியல் இடங்களில் சேர்வதற்காக இந்த ஆண்டு 2.23 லட்சம் மாணவர்கள் விண்ணப்பித்துள்ளனர். விண்ணப்பித்த மாணவர்கள் அனைவருக்கும் முதல்கட்டமாக 'ரேண்டம் எண்' (Random Number) ஒதுக்கீடு செய்யப்பட்டு, அதன்பின்னர் அவர்களின் சான்றிதழ்கள் ஆன்லைன் வாயிலாகச் சரிபார்க்கப்பட்டன.

கலந்தாய்வு தேதிகள் அறிவிப்பு & குறைதீர்க்கும் காலம்

தரவரிசைப் பட்டியல் வெளியானதைத் தொடர்ந்து, பொறியியல் சேர்க்கைக்கான ஆன்லைன் கலந்தாய்வு (Counselling) தேதிகளையும் அமைச்சர் இன்று அறிவிக்க உள்ளார். சிபிஎஸ்இ (CBSE) மறுமதிப்பீட்டு முடிவுகள் கடந்த ஜூன் 21 அன்று வெளியானதால், அந்த மாணவர்களின் மதிப்பெண்களையும் கணக்கில் கொண்டு இந்தத் தரவரிசைப் பட்டியல் இறுதி செய்யப்பட்டுள்ளது. இன்று வெளியாகும் தரவரிசைப் பட்டியலில் ஏதேனும் புகார்கள் அல்லது திருத்தங்கள் இருந்தால், மாணவர்கள் ஜூலை 1 முதல் ஜூலை 5 வரை தங்களுக்கு அருகில் உள்ள பொறியியல் சேர்க்கை உதவி மையங்களை (TFC) நாடித் தீர்வு பெற்றுக் கொள்ளலாம் என்றும் அறிவிக்கப்பட்டுள்ளது.