சென்னை சென்ட்ரலில் துணிகரம்: தூங்கிக் கொண்டிருந்த 8 வயது சிறுமி கடத்தல்—ஆட்டோ ஓட்டுநரின் சாதுரியத்தால் 30 நிமிடத்தில் மீட்பு!
சென்னை: சென்னை சென்ட்ரல் ரயில் நிலையம் அருகே பெற்றோருடன் தூங்கிக் கொண்டிருந்த ஜார்க்கண்ட் மாநிலத்தைச் சேர்ந்த 8 வயது சிறுமியை நள்ளிரவில் கடத்திச் சென்ற பெயிண்டரை, ஆட்டோ ஓட்டுநர் ஒருவர் தனது சாமர்த்தியத்தால் தடுத்து நிறுத்தினார். ஆட்டோ ஓட்டுநர் கொடுத்த துரித தகவலின் பேரில் சம்பவ இடத்திற்கு விரைந்த போலீஸார், கடத்தப்பட்ட அரை மணி நேரத்திற்குள் சிறுமியைப் பத்திரமாக மீட்டு அவளது பெற்றோரிடம் ஒப்படைத்தனர். இச்சம்பவத்தில் கடத்தல்காரன் அதிரடியாகக் கைது செய்யப்பட்டுள்ளான்.
ஜார்க்கண்ட் மாநிலத்தைச் சேர்ந்த ஷனிஜல் தாஸ் (56) என்பவர், தனது மனைவி மற்றும் இரண்டு குழந்தைகளுடன் திருச்சியில் தங்கி விவசாயக் கூலி வேலை செய்து வருகிறார். இவர் தனது குடும்பத்தினருடன் சொந்த ஊருக்குச் செல்வதற்காக சென்னை சென்ட்ரல் ரயில் நிலையத்திற்கு வந்திருந்தார். ரயில் புறப்படக் காலதாமதம் ஆனதால், சென்ட்ரல் புறநகர் ரயில் நிலையம் அருகே உள்ள நடைபாதையில் (பிளாட்பாரத்தில்) குடும்பத்துடன் தூங்கிக் கொண்டிருந்தார். நேற்று அதிகாலை 3 மணியளவில் அங்கு வந்த மர்ம நபர் ஒருவன், பெற்றோரின் அருகில் ஆழமான தூக்கத்தில் இருந்த 8 வயது சிறுமியை யாருக்கும் தெரியாமல் தனது தோளில் தூக்கிக்கொண்டு வால்டாக்ஸ் சாலை நோக்கி அதிவேகமாக நடந்து சென்றுள்ளான்.
அப்போது அந்த வழியாக வந்த பெரியமேடு பகுதியைச் சேர்ந்த ஆட்டோ ஓட்டுநர் முருகன் என்பவருக்கு, நள்ளிரவில் குழந்தையைத் தூக்கிச் செல்லும் அந்த நபரின் மீது பலத்த சந்தேகம் ஏற்பட்டது. உடனே ஆட்டோவை நிறுத்தி அந்த நபரிடம் முருகன் விசாரித்துள்ளார். அதற்கு அந்த நபர் பதற்றத்துடன் தமிழில் பதிலளித்துள்ளார். ஆனால், அவனது தோளில் இருந்த சிறுமியோ இந்தியில் பேசியபடி பயந்து அழத் தொடங்கியுள்ளது. மொழியிலும், நடத்தையிலும் இருந்த முரண்பாட்டை வைத்து கடத்தலை உறுதி செய்த ஆட்டோ ஓட்டுநர் முருகன், சுதாரித்துக் கொண்டு அந்நபரைத் தடுத்து நிறுத்தியதோடு, உடனடியாக யானைக்கவுனி காவல் நிலைய போலீஸாருக்கு ரகசியத் தகவல் கொடுத்தார்.
தகவல் கிடைத்த அடுத்த சில நிமிடங்களில் போலீஸார் சம்பவ இடத்திற்கு விரைந்து வந்து விசாரணை நடத்தினர். அதில் அந்த நபர் சிறுமியைக் கடத்திச் சென்றது உறுதியானதை அடுத்து, சிறுமியை மீட்ட போலீஸார் கடத்தல்காரனைப் பிடித்து பெரியமேடு காவல் நிலையத்திற்கு அழைத்துச் சென்றனர். போலீஸார் நடத்திய தீவிர விசாரணையில், சிறுமியைக் கடத்தியவன் திருவள்ளூர் மாவட்டம் பொன்னேரியைச் சேர்ந்த பெயிண்டர் சசிகுமார் (42) என்பது தெரியவந்தது. இதையடுத்து அவர் மீது வழக்குப் பதிவு செய்து போலீஸார் கைது செய்தனர். ஆட்டோ ஓட்டுநர் முருகனின் சாதுரியமான செயலால், கடத்தப்பட்ட 30 நிமிடத்திற்குள் தங்களது மகள் மீட்கப்பட்டதைக் கண்டு நெகிழ்ந்த பெற்றோர், கண்ணீர்மல்க போலீஸாருக்கும், ஆட்டோ ஓட்டுநருக்கும் தங்களது நெஞ்சார்ந்த நன்றியைத் தெரிவித்துக் கொண்டனர்.
AthibAn Tv