நெல்லையில் தாமிரபரணியைக் காக்க ரூ.59 கோடி திட்டம்... உண்மையில் பயன் ஏற்படுமா? - இயற்கை ஆர்வலர்கள் எழுப்பும் அடுக்கடுக்கான கேள்விகள்!

நெல்லையில் தாமிரபரணியைக் காக்க ரூ.59 கோடி திட்டம்... உண்மையில் பயன் ஏற்படுமா? - இயற்கை ஆர்வலர்கள் எழுப்பும் அடுக்கடுக்கான கேள்விகள்!

திருநெல்வேலி: திருநெல்வேலி மாநகராட்சி சார்பில் தாமிரபரணி ஆற்றைப் பாதுகாத்து மேம்படுத்துவதற்காக ரூ.59 கோடி மதிப்பில் புதிய திட்டம் அறிவிக்கப்பட்டு, அதற்கான ஒப்பந்தப்புள்ளிகள் (Tenders) கோரப்பட்டுள்ளன. ஆனால், இத்திட்டத்தால் நதிக்கு எவ்விதப் பயனும் ஏற்படப் போவதில்லை என்றும், இது மக்கள் பணத்தை விரயம் செய்யும் செயல் என்றும் இயற்கை ஆர்வலர்கள் மற்றும் சுற்றுச்சூழல் அமைப்பினர் கடுமையான எச்சரிக்கைகளை முன்வைத்துள்ளனர்.

தாமிரபரணி ஆற்றில் கழிவுநீர் கலப்பதைத் தடுக்கக் கோரியும், ஆற்றங்கரையில் உள்ள வரலாற்றுச் சிறப்புமிக்க மண்டபங்களைப் பாதுகாக்கக் கோரியும் கடந்த 2018-ஆம் ஆண்டு முதல் உயர்நீதிமன்ற மதுரைக் கிளையில் தொடர்ந்து சட்டப் போராட்டம் நடத்தி வரும் இயற்கை ஆர்வலர் முத்தாலங்குறிச்சி காமராசு இத்திட்டம் குறித்து எழுப்பியுள்ள முக்கியக் குற்றச்சாட்டுகள் மற்றும் பின்னணி இதோ:

நீதிமன்ற உத்தரவுகளும், 'நீர் மனிதர்' ராஜேந்திர சிங்கின் ஆய்வும்:

இந்த வழக்கை விசாரித்த மதுரை உயர்நீதிமன்ற நீதிபதிகள் ஜி.ஆர்.சுவாமிநாதன், புகழேந்தி ஆகியோர் அடங்கிய அமர்வு, கடந்த 2024 மார்ச் 11 அன்று, "ஆற்றில் சாக்கடை கலப்பதைத் தடுக்க உள்ளாட்சித் துறையும், படித்துறைகள் மற்றும் மண்டபங்களைச் சீரமைக்க இந்து சமய அறநிலையத்துறையும் நடவடிக்கை எடுக்க வேண்டும்" என உத்தரவிட்டது.

அதிகாரிகள் இதனை நடைமுறைப்படுத்தாததால், 2024 நவம்பரில் நீதிபதிகள் நெல்லைக்கே நேரில் வந்து கள ஆய்வு செய்தனர். தொடர்ந்து, 2025 ஜனவரி 2-இல் நீதிமன்றம் பிறப்பித்த அதிரடி உத்தரவில், ராஜஸ்தானில் ஆறுகளை மீட்டெடுத்து 'மகசேசே' விருது பெற்ற இந்தியாவின் நீர் மனிதர் ராஜேந்திர சிங்கை இந்த பணிக்கான ஆணையராக நியமித்தது. அவர் 2025 ஜனவரி 4 அன்று தாமிரபரணியை நேரடியாக ஆய்வு செய்து, அதற்கான விரிவான புனரமைப்பு வரைவு அறிக்கையை நீதிமன்றத்தில் விரைவில் தாக்கல் செய்யவுள்ளார்.

மத்திய அரசும் ‘ஜல் ஜீவன்’ திட்டம் மூலம் பாபநாசம் முதல் புன்னகாயல் வரை தாமிரபரணியைச் சீரமைக்கப் பணம் ஒதுக்கீடு செய்வதாக நீதிமன்றத்தில் அறிவித்துள்ளது. 'பொருநை புனரமைப்பு கூட்டியக்கம்' சார்பிலும் டிஜிட்டல் வரைபடம் தயாராகி வருகிறது.

ரூ.59 கோடி திட்டத்தில் உள்ள குளறுபடிகள் என்னென்ன?

நீதிமன்றத்தின் மூலம் ஒட்டுமொத்த நதிக்குமான மெகா வரைவுத் திட்டம் இறுதி செய்யப்படவுள்ள சூழலில், திருநெல்வேலி மாநகராட்சி அவசர அவசரமாக இந்த 59 கோடி ரூபாய் திட்டத்தை அறிவித்துள்ளது ஏன் என்ற கேள்வி எழுந்துள்ளது. இத்திட்டத்தின் முக்கியப் பலவீனங்களாக இயற்கை ஆர்வலர்கள் சுட்டிக்காட்டுபவை:

• சுத்திகரிக்கப்படாத சாக்கடை: மாநகராட்சியின் ஒட்டுமொத்த கழிவுக்கூடமான ராமையன்பட்டி சாக்கடை சேகரிப்பு நிலையத்திலிருந்து ஒரு சொட்டு நீர் கூட ஆற்றில் கலக்கக் கூடாது. ஆனால், தற்போது சாக்கடை கலக்கும் 23 இடங்களில் பழைய தோல்வியடைந்த திட்டங்கள் மூலமே சுத்திகரிக்க மாநகராட்சி முயல்கிறது. கடந்த காலங்களில் ஆற்றுக்குள் அமைக்கப்பட்ட கழிவுநீர் சுத்திகரிப்பு நிலையங்கள் யாவும் பாழ்பட்டுக் கிடக்கின்றன.

• அழகுபடுத்துகிறோம் என்ற பெயரில் ஆபத்து: கடைகள், இருக்கைகள், நிழற்கூடங்கள் மற்றும் தடுப்புச்சுவர்களை நதிக்குள்ளோ அல்லது ஆற்றங்கரையிலோ கட்டுவது நதியின் ஓட்டத்தைத் தடுத்து பல்லுயிர்ச் சூழலை (Biodiversity) முற்றிலுமாக அழித்துவிடும்.

• வெள்ள அபாயம்: நதிக்குள் கட்டடங்களை அனுமதித்தால், அடுத்த பெருவெள்ளத்தின் போது நெல்லை சந்திப்பு பகுதி வரலாறு காணாத கூடுதல் அழிவைச் சந்திக்கும். மேலும், இந்த ஆடம்பரக் கட்டடங்கள் யாவும் வெள்ளத்தில் அடித்துச் செல்லப்பட்டுவிடும்.

ஆட்சியர் அலுவலகத்தின் முந்தைய கசப்பான பாடம்:

ஏற்கனவே ஸ்மார்ட் சிட்டி (Smart City) திட்டத்தின் கீழ் திருநெல்வேலி மாவட்ட ஆட்சியர் அலுவலகம் முன்பு ஆற்றங்கரையில் கட்டப்பட்ட கட்டடங்கள், நதிக்கும் மக்களுக்குமான பாரம்பரியத் தொடர்பைத் துண்டித்துவிட்டன. தற்போது அந்த இடங்கள் மக்கள் பயன்பாட்டுக்கு உதவாமல், சமூக விரோதிகளின் கூடாரமாக மாறிப் பாழ்பட்டுக் கிடப்பதே இதற்குச் சான்று.

தீர்வு என்ன?

"மாநகராட்சி இந்த 59 கோடி ரூபாயைத் தனியாகத் தங்களுக்குத் தெரிந்த ஒப்பந்ததாரர்களுக்குத் தாரை வார்ப்பதை நிறுத்த வேண்டும். நீதிமன்றம் மூலம் மத்திய, மாநில அரசுகள் பாபநாசம் முதல் புன்னகாயல் வரை செயல்படுத்தவுள்ள பிரம்மாண்ட திட்டத்தோடு மாநகராட்சியின் இத்திட்டத்தையும் இணைக்க வேண்டும்.

நவீன இயந்திரங்கள் மூலம் சாக்கடையைச் சுத்திகரித்து, அந்த நன்னீரை மரம் வளர்க்க மட்டுமே பயன்படுத்த வேண்டும். நதிக்குள் எவ்விதப் புதிய கட்டடங்களையும் அனுமதிக்காமல், சிதிலமடைந்துள்ள பழமையான 25 கல் மண்டபங்களை முறையாகப் பராமரித்தாலே தாமிரபரணி தானாகவே சிறந்த ஆன்மீக மற்றும் சுற்றுச்சூழல் சுற்றுலாத் தலமாக மாறிவிடும்" என்று இயற்கை ஆர்வலர்கள் திட்டவட்டமாக வலியுறுத்தியுள்ளனர்.