“ரூ.50 கோடி பேரம்; மிரட்டி ஆள் பிடிக்கும் விஜய் அரசு” - தவெகவுக்கு எதிராக ஆளுநரிடம் திமுக அடுக்கடுக்கான பகீர் புகார்கள்!

“ரூ.50 கோடி பேரம்; மிரட்டி ஆள் பிடிக்கும் விஜய் அரசு” - தவெகவுக்கு எதிராக ஆளுநரிடம் திமுக அடுக்கடுக்கான பகீர் புகார்கள்!

சென்னை: "தமிழகத்தில் தவெக அரசு ஆக்கப்பூர்வமான பணிகள் எதையும் செய்யாமல், முழுக்க முழுக்க எதிர்க்கட்சி எம்.எல்.ஏ-க்களை மிரட்டியும், பணம் கொடுத்தும் ஆள் பிடிக்கும் வேலையை மட்டுமே செய்து வருகிறது" என்று திமுக அமைப்புச் செயலாளர் ஆர்.எஸ்.பாரதி மிகக் கடுமையான குற்றச்சாட்டுகளை முன்வைத்துள்ளார்.

தமிழக ஆளுநர் ராஜேந்திர அர்லேகரை திமுக அமைப்புச் செயலாளர் ஆர்.எஸ்.பாரதி, நாகர்கோவில் தொகுதி எம்.எல்.ஏ எஸ்.ஆஸ்டின், திமுக தலைமைச் சட்ட ஆலோசகர் பி.வில்சன் மற்றும் சட்டத்துறை இணைச் செயலாளர் இ.பரந்தாமன் ஆகியோர் இன்று ராஜ்பவனில் நேரில் சந்தித்து, தவெக அரசுக்கு எதிரான அடுக்கடுக்கான குதிரை பேரப் புகார்கள் அடங்கிய மனுவை அளித்தனர்.

ஆளுநருடனான சந்திப்பிற்குப் பிறகு செய்தியாளர்களிடம் பேசிய ஆர்.எஸ்.பாரதி மற்றும் திமுக வெளியிட்ட அதிகாரப்பூர்வ அறிக்கையின் விரிவான விவரம்:

ரூ.50 கோடி பேரம் மற்றும் அமைச்சர் பதவி ஆசை: "மதிமுக பொதுச் செயலாளர் வைகோ ஏற்கனவே குறிப்பிட்டபடி, உதயசூரியன் சின்னத்தில் போட்டியிட்டு வெற்றி பெற்ற சீர்காழி மற்றும் கடையநல்லூர் தொகுதி சட்டமன்ற உறுப்பினர்களைத் தவெக தரப்பினர் தொடர்பு கொண்டு, பதவியை ராஜினாமா செய்துவிட்டு தவெக சார்பில் இடைத்தேர்தலில் நிற்குமாறு வற்புறுத்தி வருகின்றனர்.

அதேபோல், வேப்பனஹள்ளி திமுக எம்.எல்.ஏ சீனிவாசனைத் தொடர்பு கொண்டு, 'ரூ.50 கோடி பணம் தருகிறோம், நீங்கள் விரும்பும் வாரியத் தலைவர் பதவி தருகிறோம், பதவியை ராஜினாமா செய்துவிட்டு தவெகவிற்கு வாருங்கள்' எனப் பேரம் பேசியுள்ளனர். மேலும், நாகர்கோவில் தொகுதி எம்.எல்.ஏ ஆஸ்டினைத் தொடர்பு கொண்டு, 'நீங்கள் விரும்பும் முக்கியத் துறை அமைச்சர் பதவியைத் தருகிறோம், உடனே தவெகவில் இணையுங்கள்' என நிர்ப்பந்தித்துள்ளனர்."

கைது என்ற பெயரில் அனிதா ராதாகிருஷ்ணனுக்கு மிரட்டல்: "குதிரை பேரத்தின் உச்சமாக, நேற்று அவதூறு வழக்கு என்ற பெயரில் திருச்செந்தூர் தொகுதி திமுக எம்.எல்.ஏ அனிதா ராதாகிருஷ்ணன் நள்ளிரவில் பலவந்தமாகக் கைது செய்யப்பட்டார். அவதூறு வழக்குகளில் கைது செய்யும் நடைமுறையே இல்லாத சூழலில், அவரைத் தூத்துக்குடி எஸ்.பி அலுவலகத்தில் 5 மணி நேரம் அடைத்து வைத்து, 'சட்டமன்ற உறுப்பினர் பதவியை ராஜினாமா செய்துவிட்டு தவெகவில் இணைந்துவிடுங்கள்' என அதிகாரிகள் மூலம் குதிரை பேரம் நடத்தியுள்ளனர். இது அனிதா ராதாகிருஷ்ணனின் பேட்டி மூலமாகவே அம்பலமாகியுள்ளது."

நிழல் மனிதர்களின் தலையீடும், பாதுகாப்பு விதிமீறலும்: "அரசுக்கு எவ்விதத்திலும் தொடர்பில்லாத முதல்வரின் நண்பர்களான ஜான் ஆரோக்கியசாமி, விஷ்ணு ரெட்டி ஆகிய இரு தனி நபர்கள் அதிகாரப்பூர்வ அமைச்சரவைக் கூட்டங்கள் (Cabinet Meetings) முதல் அனைத்து உயர்மட்டக் கூட்டங்களிலும் கலந்து கொண்டு அதிகாரிகளுக்கு உத்தரவிடுகின்றனர். இவர்களுக்குத் தலைமைச் செயலகத்திலேயே (Secretariat) தனியாக அறைகள் ஒதுக்கப்பட்டுள்ளன.

அதேபோல், முதல்வரின் பாதுகாப்பு விதிகளுக்கு முரணாக அவரது தனிப் பாதுகாவலர் ஒருவர், சட்டத்திற்குப் புறம்பாக முதல்வர் அலுவலகம் உள்ளிட்ட அனைத்து அரசு நிகழ்ச்சிகளிலும் முதல்வருடனேயே பயணித்து வருகிறார். இத்தகைய அதிகார துஷ்பிரயோகம் குறித்தும் ஆளுநரிடம் விளக்கியுள்ளோம்."

ஆளுநரின் உறுதி: "அரசுடன் தொடர்பில்லாத தனி நபர்கள் அரசு கூட்டங்களில் கலந்து கொள்ள எந்தவித அதிகாரமும் கிடையாது என்ற தனது தெளிவான நிலைப்பாட்டை ஆளுநர் எங்களிடம் வெளிப்படுத்தினார். நாங்கள் அளித்த அனைத்துப் புகார்களையும், அதற்கான ஆதாரங்களையும் கவனமுடன் கேட்டறிந்த ஆளுநர், இதன் மீது உரிய சட்டப்பூர்வ நடவடிக்கை எடுப்பதாக உறுதியளித்துள்ளார்" என ஆர்.எஸ்.பாரதி தெரிவித்தார்.

செய்திப் பின்னணி: தமிழகத்தில் புதிய ஆட்சி அமைந்த பிறகு, ஏற்கனவே பாஜக மற்றும் அதிமுக ஆகிய கட்சிகள் தவெக அரசுக்கு எதிராகக் குதிரை பேரப் புகார்களை ஆளுநரிடம் அளித்திருந்த நிலையில், தற்போது பிரதான எதிர்க்கட்சியான திமுகவும் எம்.எல்.ஏ-க்களுக்கு ரூ.50 கோடி பேரம் மற்றும் மிரட்டல் விடுக்கப்படுவதாகப் பகிரங்கமாகக் குற்றம் சாட்டி ஆளுநரைச் சந்தித்திருப்பது தமிழக அரசியலில் பெரும் பூகம்பத்தைக் கிளப்பியுள்ளது.