ஃபிஃபா உலகக் கோப்பை 2026: 10 வீரர்களுடன் போராடி போஸ்னியாவை வீழ்த்தியது அமெரிக்கா! 24 ஆண்டு கால நாக்-அவுட் சோகத்திற்கு முற்றுப்புள்ளி!
சான்டா கிளாரா: அமெரிக்காவின் சான்டா கிளாரா நகரில் நடைபெற்ற ஃபிஃபா (FIFA) உலகக் கோப்பை கால்பந்து தொடரின் விறுவிறுப்பான நாக்-அவுட் சுற்றில், அமெரிக்கா மற்றும் போஸ்னியா & ஹெர்சகோவினா அணிகள் பலப்பரீட்சை நடத்தின. ஆட்டத்தின் தொடக்கத்தில் போஸ்னியா அணி அமெரிக்காவுக்குக் கடுமையான சவால்களைக் கொடுத்து கோல் வாய்ப்புகளை உருவாக்கியது. எனினும், முதல் பாதியின் இறுதி நிமிடத்தில் (45-வது நிமிடம்), மாலிக் திலெமன்ஸ் கொடுத்த நேர்த்தியான பாஸை கச்சிதமாகப் பயன்படுத்திய அமெரிக்க வீரர் ஃபொலாரின் பாலோகன், ஒரு தாழ்வான ஷாட் மூலம் பந்தை கோல் வலைக்குள் தள்ளி அமெரிக்காவை 1-0 என முன்னிலை பெறச் செய்தார். முன்னதாக 31-வது நிமிடத்தில் அவர் அடித்த கோல் ஒன்று 'ஆஃப்ஸைடு' என மறுக்கப்பட்டிருந்தது குறிப்பிடத்தக்கது.
ஆட்டத்தின் இரண்டாவது பாதியில் பெரும் திருப்பமாக, 64-வது நிமிடத்தில் போஸ்னியா வீரர் தாரிக் முஹாரெமோவிச்சை ஃபவுல் செய்ததற்காக விஏஆர் (VAR) பரிசீலனைக்குப் பிறகு ஃபொலாரின் பாலோகனுக்கு ரெட் கார்டு (சிவப்பு அட்டை) காண்பிக்கப்பட்டு வெளியேற்றப்பட்டார். இதனால் அமெரிக்கா 10 வீரர்களுடன் விளையாட வேண்டிய நெருக்கடிக்குத் தள்ளப்பட்டது. ஆட்டத்தின் 78-வது நிமிடத்தில் அமெரிக்க நட்சத்திர வீரர் கிறிஸ்டியன் புலிசிக் அடித்த கோலும் ஆஃப்ஸைடு என அறிவிக்கப்பட்டது. எனினும், 82-வது நிமிடத்தில் கிடைத்த ஃப்ரீ-கிக் வாய்ப்பில், மாலிக் திலெமன்ஸ் பாக்ஸின் வெளிப்பகுதியில் இருந்து அடித்த அற்புதாமான கர்லிங் ஷாட் போஸ்னியா தடுப்புச்சுவரைத் தாண்டி கோலாக மாறியது. இதனால் அமெரிக்கா 2-0 என்ற கணக்கில் அபார வெற்றி பெற்று 'ரவுண்ட் ஆஃப் 16' சுற்றுக்கு அதிகாரப்பூர்வமாக முன்னேறியது. வரும் ஜூலை 6-ஆம் தேதி நடைபெறவுள்ள அடுத்த சுற்றில் அமெரிக்கா, பலம் வாய்ந்த பெல்ஜியம் அணியை எதிர்கொள்கிறது.
இந்த வெற்றியின் மூலம் அமெரிக்க அணி பல்வேறு வரலாற்றுச் சாதனைகளைப் படைத்துள்ளது:
24 ஆண்டு கால சாதனை: உலகக் கோப்பை வரலாற்றில் 2002-ஆம் ஆண்டுக்குப் பிறகு நாக்-அவுட் சுற்றில் அமெரிக்கா பெறும் முதல் வெற்றி இதுவாகும். ஒட்டுமொத்த உலகக் கோப்பை வரலாற்றில் நாக்-அவுட் சுற்றில் அமெரிக்கா வெல்வது இது 2-வது முறை மட்டுமே (முன்னதாக 2002-ல் மெக்சிகோவை வீழ்த்தியிருந்தது).
பயிற்சியாளர் சாதனை: நடப்புத் தொடரில் 3-வது வெற்றியைப் பதிவு செய்ததன் மூலம், உலகக் கோப்பை வரலாற்றில் மூன்று வெற்றிகளைப் பெற்ற முதல் அமெரிக்கப் பயிற்சியாளர் என்ற வரலாற்றுச் சாதனையை மொரிசியோ பொச்செட்டினோ படைத்துள்ளார்.
ஐரோப்பிய சோகத்திற்கு முற்றுப்புள்ளி: உலகக் கோப்பை தொடர்களில் ஐரோப்பிய அணிகளுக்கு எதிராகத் தொடர்ச்சியாக 10 ஆட்டங்களில் தோல்வியைத் தழுவியிருந்த அமெரிக்கா, தற்போது போஸ்னியாவை வீழ்த்தி அந்தப் பின்னடைவுக்கு முற்றுப்புள்ளி வைத்துள்ளது.
பாலோகனின் தேவையற்ற சாதனை: இப்போட்டியில் கோல் அடித்த பிறகு ரெட் கார்டு பெற்று வெளியேறியதன் மூலம், உலகக் கோப்பை வரலாற்றில் இந்தத் தேவையற்ற சாதனையைச் செய்த 4-வது வீரர் என்ற வரிசையில் ஃபொலாரின் பாலோகன் இணைந்துள்ளார் (இதற்கு முன் 2006-ல் பிரான்ஸின் ஜினெடின் ஜிடேன் இவ்வாறு வெளியேறினார்). இந்த ரெட் கார்டு காரணமாக பெல்ஜியத்திற்கு எதிரான அடுத்த முக்கியப் போட்டியில் பாலோகன் விளையாட முடியாது என்பது அமெரிக்க அணிக்குப் பின்னடைவாகக் கருதப்படுகிறது.
AthibAn Tv