“பில் தொகையை ரிலீஸ் செய்ய ரூ.1 லட்சம் லஞ்சம்!”: தஞ்சை அறநிலையத் துறை இணை ஆணையர் மற்றும் அவரது தோழி லஞ்ச ஒழிப்புப் போலீசாரால் அதிரடி கைது!
தஞ்சாவூர்: தஞ்சாவூரில் உள்ள பிரசித்தி பெற்ற பழமையான கோயில் ஒன்றின் திருப்பணிகளை மேற்கொண்டதற்கான பில் தொகையை வழங்குவதற்கு ரூ.1 லட்சம் லஞ்சம் வாங்கியதாக, இந்து சமய அறநிலையத் துறை பெண் இணை ஆணையர் மற்றும் அவருக்கு உடந்தையாகச் செயல்பட்ட அவரது நெருங்கிய தோழி ஆகிய இருவரை லஞ்ச ஒழிப்புப் பிரிவு போலீசார் நேற்று மாலை அதிரடியாகக் கைது செய்துள்ளனர். தஞ்சாவூர் இந்து சமய அறநிலையத் துறை அலுவலகத்தில் அரங்கேறிய இந்த ஊழல் தடுப்பு நடவடிக்கை, அரசு அதிகாரிகள் மற்றும் பொதுமக்களிடையே பெரும் பரபரப்பை ஏற்படுத்தியுள்ளது.
தஞ்சாவூர் மாவட்டம் அம்மாப்பேட்டை அருகே உள்ள தீபாம்பாள்புரம் கிராமத்தில் பழமையான வன்மீகநாதர் திருக்கோயில் அமைந்துள்ளது. இக்கோயிலின் திருப்பணிகள் (புனரமைப்புப் பணிகள்) தற்போது தீவிரமாக நடைபெற்று வருகின்றன. இந்தப் பணிகளை ஒப்பந்த அடிப்படையில் நாகப்பட்டினத்தைச் சேர்ந்த மதியழகன் என்பவர் மேற்கொண்டு வருகிறார். இந்த நிலையில், தான் செய்த திருப்பணிகளுக்கான பில் தொகையைத் தனக்கு ரிலீஸ் செய்து தருமாறு, தஞ்சாவூரில் உள்ள இந்து சமய அறநிலையத் துறை இணை ஆணையர் ஜோதிலட்சுமியிடம் (47) மதியழகன் முறையிட்டுள்ளார். ஆனால், அந்த பில் தொகையை ஒப்புதல் அளித்து வழங்க வேண்டுமானால் தனக்கு ரூ.1 லட்சம் லஞ்சம் தர வேண்டும் என ஜோதிலட்சுமி கறாராகக் கேட்டுள்ளார்.
ஊழல் அதிகாரியான இணை ஆணையருக்கு லஞ்சம் கொடுக்க விரும்பாத ஒப்பந்ததாரர் மதியழகன், இது குறித்து தஞ்சாவூர் மாவட்ட லஞ்ச ஒழிப்புப் பிரிவு போலீசாரிடம் ரகசியமாகப் புகார் அளித்தார். புகாரைப் பெற்றுக் கொண்ட போலீஸாரின் ஆலோசனையின்படி, இரசாயனம் தடவிய ரூ.1 லட்சம் பண நோட்டுகளுடன் மதியழகன் நேற்று மாலை தஞ்சாவூர் இந்து சமய அறநிலையத் துறை அலுவலகத்திற்குச் சென்றுள்ளார். அங்கு, இணை ஆணையர் ஜோதிலட்சுமியின் அறிவுறுத்தலின்படி, அவரது அறையில் இருந்த அவரது நெருங்கிய தோழியான கிரிஜாவிடம் (51) மதியழகன் அந்தப் பணத்தைக் கொடுத்துள்ளார். கிரிஜாவும் அந்தப் பணத்தைப் பெற்றுக் கொண்டு உடனடியாக ஜோதிலட்சுமியிடம் ஒப்படைத்துள்ளார்.
அப்போது, அந்த அலுவலக வளாகத்தில் சாதாரண உடையில் மறைந்திருந்த லஞ்ச ஒழிப்புப் பிரிவு துணை கண்காணிப்பாளர் அன்பரசன், ஆய்வாளர்கள் பத்மாவதி, அருண் மற்றும் போலீசார் அடங்கிய தனிப்படையினர் அதிரடியாக அறைக்குள் புகுந்தனர். லஞ்சப் பணத்தை வாங்கிய இணை ஆணையர் ஜோதிலட்சுமி மற்றும் கிரிஜா ஆகிய இருவரையும் கையும் களவுமாகப் பிடித்துக் கைது செய்தனர். இந்த அதிரடி வேட்டையைத் தொடர்ந்து, தஞ்சாவூர் நாஞ்சிக்கோட்டை சாலை பிலோமினா நகரில் உள்ள இணை ஆணையர் ஜோதிலட்சுமியின் சொகுசு வீட்டிற்கும் விரைந்த லஞ்ச ஒழிப்பு போலீசார், அங்கு விடிய விடிய அதிரடி சோதனையில் ஈடுபட்டனர். கைது செய்யப்பட்ட ஜோதிலட்சுமியும் கிரிஜாவும் நீண்ட கால நெருங்கிய தோழிகள் என்பதும், கிரிஜாவை லஞ்சப் பணப் பரிமாற்றத்திற்கு ஜோதிலட்சுமி இடைத்தரகராகப் பயன்படுத்தியதும் விசாரணையில் தெரியவந்துள்ளது.
AthibAn Tv