‘திருப்பரங்குன்றம் ஃபைல்ஸ்’ படம் மூலம் சட்டம் ஒழுங்கை சீர்குலைக்க திமுக சதி: இந்து முன்னணி மாநிலத் தலைவர் காடேஸ்வரா சுப்பிரமணியம் அதிரடி எச்சரிக்கை!
சென்னை: "திருப்பரங்குன்றம் ஃபைல்ஸ் என்ற பெயரில் ஆவணப்படம் என்ற போர்வையில் சட்டம் ஒழுங்கை சீர்குலைக்க திமுக ஆதரவாளர்கள் சதி செய்கிறார்கள்; முருகப் பெருமானின் பக்தர்கள் ஒன்றிணைந்து இந்தச் சதியை நிச்சயம் முறியடிப்போம்" என்று இந்து முன்னணி மாநிலத் தலைவர் காடேஸ்வரா சி. சுப்பிரமணியம் கடுமையான கண்டன அறிக்கை ஒன்றை வெளியிட்டுள்ளார். நீதிமன்ற விசாரணையில் இருக்கும் ஒரு விவகாரத்தை அடிப்படையாகக் கொண்டு, தணிக்கைச் சான்றிதழ் இன்றித் திரைப்படம் வெளியிட முயல்வது சட்டவிரோதமானது என்றும் அவர் சாடியுள்ளார்.
அவர் வெளியிட்டுள்ள அறிக்கையில், "திருப்பரங்குன்றம் மலை உச்சியில் கார்த்திகை தீபம் ஏற்றுவது தொடர்பான நீதிமன்றத் தீர்ப்பு இன்று வரை எவ்வித தடையோ, அல்லது மேல்முறையீடோ இன்றி அப்படியே அமலில் உள்ளது. இந்த விவகாரத்தில் உச்ச நீதிமன்றம் செல்லப்போவதாகத் தமிழக அரசு தெரிவித்துள்ளதே தவிர, தற்போதைய நிலையில் வழக்கு இன்னும் நிலுவையில் தான் உள்ளது. திருப்பரங்குன்றம் மலை உச்சி தீபத்தூணில் தான் தீபம் ஏற்றப்பட வேண்டும் என்பதைத் தமிழக மக்கள் ஒட்டுமொத்தமாக விரும்புகிறார்கள் என்பதற்கு, மதுரையில் எட்டு லட்சம் முருக பக்தர்கள் திரண்ட மாநாடே மிகச்சிறந்த சாட்சியாக அமைந்தது" என்று சுட்டிக்காட்டியுள்ளார்.
மேலும், புதிய ஆட்சி அமைந்த பிறகு திமுக ஆதரவாளர்கள் தொடர்ந்து சட்டம் ஒழுங்கைச் சீர்குலைக்கத் திட்டமிட்டு வருவதாகக் குற்றம்சாட்டிய அவர், "நீதிமன்றத்தின் நேரடி விசாரணையில் இருக்கும் திருப்பரங்குன்றம் விவகாரத்திற்கு எதிராக ஆவணப்படம் திரையிடப் போவதாகச் சமூக வலைதளங்களில் போஸ்டர்கள் வெளியாகியுள்ளன. இதுகுறித்து இந்து முன்னணி மாநில செய்தித் தொடர்பாளர் ஏ.டி. இளங்கோவன் நேரடியாக விசாரித்து, இது சட்டவிரோதமான செயல் என்பதால் சென்னை நுங்கம்பாக்கம் காவல்நிலையத்தில் முறைப்படி புகார் அளித்துள்ளார். பிரிவியூ தியேட்டரில் தனிப்பட்ட முறையில் திரையிடுவதாகக் கூறினாலும், பொதுமக்களுக்கு அழைப்பு விடுத்து விளம்பரப்படுத்துவது சட்டப்படி குற்றமாகும். சினிமா தணிக்கைத் துறையின் (Censor Board) சான்றிதழ் இல்லாமல் இதனைப் பொதுப் பார்வைக்கு வெளியிடக்கூடாது" எனத் தெரிவித்துள்ளார்.
எனவே, தமிழகக் காவல்துறை உடனடியாகத் தலையிட்டு இந்தச் சட்டவிரோதத் திரையிடலைத் தடுத்து நிறுத்த வேண்டும் என்றும், சட்டம் ஒழுங்கைச் சீர்குலைக்கும் நோக்கில் இந்தப் படத்தை வெளியிடச் சதி செய்தவர்கள் மீது வழக்குப் பதிவு செய்து, அந்தப் படத்தை முழுமையாகப் பறிமுதல் செய்ய வேண்டும் என்றும் இந்து முன்னணி சார்பில் வலியுறுத்தப்பட்டுள்ளது. ஒருவேளை, தமிழகக் காவல்துறை திமுகவின் இந்தச் சதிக்கு உடந்தையாக இருந்து வேடிக்கை பார்க்கும் நிலை ஏற்பட்டால், முருகப் பக்தர்கள் அனைவரும் இந்து முன்னணி தலைமையில் திரண்டு, நுங்கம்பாக்கத்தில் உள்ள ஃபோர் பிரேம்ஸ் பிரிவியூ தியேட்டரை முற்றுகையிட்டு ஜனநாயக வழியில் பிரம்மாண்ட ஆர்ப்பாட்டம் நடத்துவார்கள் என காடேஸ்வரா சி. சுப்பிரமணியம் தனது அறிக்கையில் எச்சரித்துள்ளார்.
AthibAn Tv