சிபிஎஸ்இ மாணவர்களுக்குப் பெரும் நிம்மதி: 7, 8, 9-ம் வகுப்பு மும்மொழித் திட்ட விதிகளில் அதிரடித் தளர்வு - 10-ம் வகுப்பில் தேர்வு எழுதத் தேவையில்லை!

சிபிஎஸ்இ மாணவர்களுக்குப் பெரும் நிம்மதி: 7, 8, 9-ம் வகுப்பு மும்மொழித் திட்ட விதிகளில் அதிரடித் தளர்வு - 10-ம் வகுப்பில் தேர்வு எழுதத் தேவையில்லை!

புதுடெல்லி: மத்திய இடைநிலை கல்வி வாரியம் (CBSE) 7, 8, 9 ஆகிய வகுப்புகளில் பயிலும் மாணவர்களுக்கான மும்மொழித் திட்ட விதிகளில் மிக முக்கிய இடைக்காலத் தளர்வுகளை அறிவித்துள்ளது. இதன் மூலம், இந்த மாணவர்கள் 10-ம் வகுப்பை அடையும்போது மூன்றாவது மொழிக்குத் தனியாகப் பொதுத்தேர்வு எழுத வேண்டிய அவசியமில்லை என்று சிபிஎஸ்இ தெளிவுபடுத்தியுள்ளது.

சிபிஎஸ்இ-யின் புதிய அறிவிப்பு என்ன?

மும்மொழித் திட்டம் தொடர்பாகச் சிபிஎஸ்இ வெளியிட்டுள்ள புதிய சுற்றறிக்கையில் கூறப்பட்டிருப்பதாவது:

• 10-ம் வகுப்பு மாணவர்களுக்கு விலக்கு: தற்போது 10-ம் வகுப்பில் பயிலும் மாணவர்கள் புதிய மும்மொழித் திட்டத்தைப் பின்பற்ற வேண்டியதில்லை.

• 7, 8, 9-ம் வகுப்பு மாணவர்களுக்குத் தளர்வு: தற்போது 7, 8, மற்றும் 9-ம் வகுப்புகளில் படித்து வரும் மாணவர்கள், வரும் காலங்களில் 10-ம் வகுப்பை எட்டும்போது மூன்றாவது மொழிக்குத் தேர்வு எழுத வேண்டியதில்லை.

• வெளிநாட்டு மொழி படிக்கும் மாணவர்களுக்குச் சலுகை: ஏற்கனவே இரண்டு வெளிநாட்டு மொழிகளைப் (Foreign languages) படித்து வரும் 7, 8, 9-ம் வகுப்பு மாணவர்கள் அதே மொழிகளைத் தடையின்றித் தொடரலாம். அதே நேரத்தில், அவர்கள் கூடுதலாக ஓர் இந்திய மொழியைக் கற்க அனுமதிக்கப்படுவார்கள். இதற்கான பாடப்புத்தகங்கள் குறிப்பிட்ட காலக்கெடுவுக்குள் பள்ளிகளுக்கு வழங்கப்படும்.

பள்ளி அளவிலான மதிப்பீடு மட்டுமே!

புதிய விதிமுறைகளின்படி, தற்போது 9-ம் வகுப்பில் உள்ள மாணவர்கள் அனைவரும் மூன்று மொழிகளைக் கற்க வேண்டும்; அதில் குறைந்தது இரண்டு மொழிகள் இந்திய மொழிகளாக இருக்க வேண்டும்.

ஏற்கனவே இரு வெளிநாட்டு மொழிகளைப் பயில்வோர், மூன்றாவது மொழியாக ஏதேனும் ஓர் இந்திய மொழியைச் சேர்த்துக் கொள்ளலாம். எனினும், இந்த மூன்றாவது கூடுதல் மொழிக்கு பள்ளி அளவிலான உள் மதிப்பீட்டு நடைமுறை (Internal Assessment) மட்டுமே பின்பற்றப்படும். இவர்கள் 10-ம் வகுப்புக்குச் செல்லும்போது இதற்கான முதன்மைத் தேர்வு எதுவும் இருக்காது. இதே தளர்வு தற்போது 7 மற்றும் 8-ம் வகுப்புகளில் படிக்கும் மாணவர்களுக்கும் நீட்டிக்கப்பட்டுள்ளது.

முந்தைய அறிவிப்பும்... எழுந்த சர்ச்சையும்:

தேசிய கல்விக் கொள்கை 2020-ன் (NEP 2020) பரிந்துரையின்படி, 2026-27-ம் கல்வியாண்டு முதல் 6-ம் வகுப்பில் இருந்து மும்மொழித் திட்டம் கட்டாயமாக அறிமுகம் செய்யப்படும் என்று கடந்த ஏப்ரல் மாதம் சிபிஎஸ்இ அறிவித்தது.

அதனைத் தொடர்ந்து, கடந்த மே 15-ம் தேதி வெளியான அறிவிப்பில், 9-ம் வகுப்பு மாணவர்களுக்கும் ஜூலை 1 முதல் மும்மொழித் திட்டத்தைக் கட்டாயமாக்குமாறு பள்ளிகளுக்கு அதிரடி உத்தரவு பிறப்பிக்கப்பட்டது. கல்வியாண்டின் நடுவே வெளியான இந்த திடீர் அறிவிப்பு, புதிய மொழியைக் கற்க வேண்டிய சூழலுக்குத் தள்ளப்பட்ட மாணவர்களுக்கும் பெற்றோர்களுக்கும் பெரும் அதிர்ச்சியையும் மன உளைச்சலையும் ஏற்படுத்தியது.

இந்தக் கடுமையான எதிர்ப்புகளையும், மாணவர்களின் நலனையும் கருத்தில் கொண்டு, தற்போது சிபிஎஸ்இ நிர்வாகம் இந்த அதிரடித் தளர்வுகளை அறிவித்துள்ளது. சிபிஎஸ்இ-யின் இந்த சுமுகமான முடிவு லட்சக்கணக்கான மாணவர்களுக்கும் பெற்றோர்களுக்கும் பெரும் நிம்மதியை அளித்துள்ளது.