வாட்ஸ்அப்பின் ‘பயனர் பெயர்’ (Username) அம்சத்திற்கு மத்திய அரசு தடை? மெட்டா நிறுவனத்திற்கு அதிரடி நோட்டீஸ்!
புதுடெல்லி:
வாட்ஸ்அப் செயலியில் பயனர்களின் தனியுரிமையைப் பாதுகாக்கும் நோக்கில் கொண்டு வரப்படவுள்ள 'பயனர் பெயர்' (Username) அம்சமானது, ஆன்லைன் மோசடிகளுக்கு அதிகளவில் வழிவகுக்கும் என இந்திய அரசு கவலை தெரிவித்துள்ளது. இது குறித்து விரிவான விளக்கம் கேட்டு, வாட்ஸ்அப்பின் தாய் நிறுவனமான மெட்டாவிற்கு (Meta) மத்திய மின்னணு மற்றும் தகவல் தொழில்நுட்ப அமைச்சகம் (MeitY) அதிரடியாக நோட்டீஸ் அனுப்பியுள்ளது. மேலும், இந்த அம்சத்தை இந்தியாவில் தற்காலிகமாக (இடைக்காலமாக) நிறுத்தி வைக்கவும் அந்த நோட்டீஸில் உத்தரவிடப்பட்டுள்ளது.
இன்றைய டிஜிட்டல் சூழலில் மக்களின் அன்றாட வாழ்வின் முக்கிய அங்கமாக மாறிவிட்ட வாட்ஸ்அப்பில், பயனர்கள் தங்களது மொபைல் எண்களைப் பிறருக்குப் பகிராமல், அதற்கு மாற்றாக பிரத்யேக யூஸர்நேம்களைப் பயன்படுத்தும் புதிய வசதியை மெட்டா நிறுவனம் வடிவமைத்துள்ளது. இன்ஸ்டாகிராம் மற்றும் பேஸ்புக் போன்ற தளங்களில் இருப்பது போலவே, வாட்ஸ்அப்பிலும் பயனர்கள் தங்களுக்குத் தேவையான பெயர்களைப் பதிவு செய்யும் நடைமுறையை இந்தியாவில் இந்நிறுவனம் தொடங்கியுள்ளது. இது வாட்ஸ்அப் வரலாற்றில் ஒரு மிக முக்கிய பிரைவசி அப்டேட்டாகப் பார்க்கப்பட்டாலும், இதனால் போலி கணக்குகள் மற்றும் சைபர் மோசடிகள் அதிகரிக்கக்கூடும் என மத்திய அரசு எச்சரித்துள்ளது.
மோசடி அபாயம்: 3 நாட்களில் விளக்கம் அளிக்க மெட்டாவிற்கு உத்தரவு!
அரசியல் மற்றும் பாதுகாப்பு வட்டாரங்களின்படி, மொபைல் எண் இல்லாமல் வெறும் யூஸர்நேம்களை மட்டுமே கொண்டு கணக்குகளைத் தொடங்கும் போது, குற்றவாளிகளைக் கண்டறிவதிலும், போலி ஐடிக்கள் மூலம் மக்கள் ஏமாற்றப்படுவதைத் தடுப்பதிலும் பெரும் சவால்கள் எழும் எனத் தகவல் தொழில்நுட்ப அமைச்சகம் கருதுகிறது. இதன் காரணமாகவே, இந்த வசதியை இந்தியாவில் முழுமையாக அறிமுகப்படுத்துவதற்கு முன்பாக, தற்காலிகத் தடை விதித்து அரசு உத்தரவிட்டுள்ளது.
மத்திய அரசு அனுப்பியுள்ள இந்த நோட்டீஸில், 'யூஸர்நேம்' அம்சத்தினால் ஏற்படக்கூடிய பாதுகாப்பு குறைபாடுகள் மற்றும் அதனைத் தடுக்க மெட்டா நிறுவனம் வைத்துள்ள கட்டுப்பாடுகள் என்னென்ன என்பது குறித்து அடுத்த 3 நாட்களுக்குள் விரிவான விளக்கத்தை அளிக்க வேண்டும் என்று கெடு விதிக்கப்பட்டுள்ளது. மெட்டா அளிக்கும் விளக்கத்தின் அடிப்படையிலேயே, இந்தியாவில் இந்த அம்சம் பயன்பாட்டிற்கு வருமா அல்லது நிரந்தரமாக நிறுத்தப்படுமா என்பது தெரியவரும் என்பதால், இந்த விவகாரம் தொழில்நுட்ப உலகிலும் பயனர்கள் மத்தியிலும் பெரும் பரப்பை ஏற்படுத்தியுள்ளது.
AthibAn Tv