"தவெகவில் இணையுமாறு என்னை போலீஸார் கட்டாயப்படுத்தினர்" - கைதான திமுக முன்னாள் அமைச்சர் அனிதா ராதாகிருஷ்ணன் செய்தியாளர்களிடம் குமுறல்!
தூத்துக்குடி / திருச்செந்தூர்: "எனது சட்டமன்ற உறுப்பினர் (எம்எல்ஏ) பதவியை உடனடியாக ராஜினாமா செய்துவிட்டு, ஆளும் தவெக கட்சியில் இணையச் சொல்லி காவல் துறையினர் என்னை விசாரணை என்ற பெயரில் கடுமையான மன உளைச்சலுக்கு ஆளாக்கிக் கட்டாயப்படுத்தினார்கள்" என்று திமுக முன்னாள் அமைச்சரும், திருச்செந்தூர் தொகுதி எம்எல்ஏவுமான அனிதா ராதாகிருஷ்ணன் அதிரடிக் குற்றச்சாட்டை முன்வைத்துள்ளார். முதல்வர் விஜய்யை அவதூறாகப் பேசிய வழக்கில் கைது செய்யப்பட்டு, சுமார் ஐந்து மணி நேரத் தீவிர விசாரணைக்குப் பிறகு போலீஸார் அவரை அழைத்துச் சென்றபோது செய்தியாளர்களிடம் அவர் இவ்வாறு குமுறியுள்ளார்.
செய்தியாளர்களிடம் ஆவேசமாகப் பேசிய அனிதா ராதாகிருஷ்ணன், "எம்எல்ஏ பதவியைத் துறந்துவிட்டு தவெகவில் இணையுமாறு போலீஸார் வற்புறுத்தியதற்கு நான் எக்காரணத்தைக் கொண்டும் ஒப்புக்கொள்ளவில்லை. எனது வாழ்நாள் முழுவதும் திமுகவிலேயே உறுதியாக இருப்பேன். ஆளும் தரப்பின் எந்தவொரு அடக்குமுறைக்கும், மிரட்டலுக்கும் நாங்கள் அஞ்சப் போவதில்லை. நான் எந்தத் தவறும் செய்யவில்லை. என் மீது முற்றிலும் அரசியல் பழிவாங்கும் நோக்கில் பொய் வழக்குப் போட்டு எங்களை யாரும் அடக்கிவிட முடியாது. விஜய் மட்டுமல்ல, யாராக இருந்தாலும் அவர்களை அரசியல் ரீதியாகவும் சட்டப்பூர்வமாகவும் எதிர்கொள்ள நாங்கள் தயாராக இருக்கிறோம். நாங்கள் என்ன கொலையா செய்துவிட்டோம்?" என்று மிகக் காரசாரமாகக் கேள்வி எழுப்பியுள்ளார்.
வழக்கின் பின்னணி: கடந்த ஜூன் 20-ஆம் தேதி தூத்துக்குடி மாவட்டம் திருச்செந்தூர் அருகே உள்ள ஆத்தூர் பகுதியில், முன்னாள் முதல்வர் கருணாநிதியின் பிறந்தநாள் விழாவை முன்னிட்டு திமுக சார்பில் பிரம்மாண்ட பொதுக்கூட்டம் நடைபெற்றது. இக்கூட்டத்தில் சிறப்புரையாற்றிய திருச்செந்தூர் தொகுதி திமுக எம்எல்ஏ அனிதா ராதாகிருஷ்ணன், தமிழக முதல்வர் விஜய் குறித்து ஒருமையிலும், மிகவும் அவதூறான வகையிலும் பேசியதாகக் கூறி தவெக நகரச் செயலாளர் செல்வம் ஆத்தூர் காவல் நிலையத்தில் முறைப்படி புகார் அளித்தார். இந்தப் புகாரின் அடிப்படையில் அனிதா ராதாகிருஷ்ணன் மீது ஆத்தூர் போலீஸார் பல்வேறு பிரிவுகளின் கீழ் வழக்குப் பதிவு செய்தனர்.
இந்த அவதூறு வழக்கில் தம்மைக் கைது செய்யாமல் இருக்க முன்ஜாமீன் கோரி அனிதா ராதாகிருஷ்ணன் சென்னை உயர் நீதிமன்றத்தில் அவசர மனுத் தாக்கல் செய்திருந்தார். எனினும், அவர் தாக்கல் செய்திருந்த முன்ஜாமீன் மனுவைச் சென்னை உயர் நீதிமன்றம் அதிரடியாகத் தள்ளுபடி செய்தது. நீதிமன்ற உத்தரவைத் தொடர்ந்து, தலைமறைவாக இருந்த அனிதா ராதாகிருஷ்ணனைக் காவல் துறையினர் இன்று (ஜூலை 4) அதிரடியாகக் கைது செய்தனர். கைதைத் தொடர்ந்து ரகசிய இடத்தில் வைத்து அவரிடம் சுமார் ஐந்து மணி நேரம் தீவிர விசாரணை நடத்தப்பட்டது. மருத்துவப் பரிசோதனைகளுக்குப் பிறகு அவர் நீதிமன்ற நடுவர் முன்னிலையில் ஆஜர்படுத்தப்பட்டு சிறையில் அடைக்கப்படுவார் எனத் தெரிகிறது. இச்சம்பவம் தமிழக அரசியல் களத்தில் பெரும் பதற்றத்தையும் பரபரப்பையும் ஏற்படுத்தியுள்ளது.
AthibAn Tv