"தேர்வர்களின் தவறான பதிவேற்றமே காரணம்!" — உதவி பேராசிரியர் தேர்வு குளறுபடி புகார்களுக்கு ஆசிரியர் தேர்வு வாரியம் அதிரடி விளக்கம்!

 "தேர்வர்களின் தவறான பதிவேற்றமே காரணம்!" — உதவி பேராசிரியர் தேர்வு குளறுபடி புகார்களுக்கு ஆசிரியர் தேர்வு வாரியம் அதிரடி விளக்கம்!

சென்னை: தமிழக அரசு கலை, அறிவியல் மற்றும் கல்வியியல் கல்லூரிகளுக்கான உதவி பேராசிரியர் தேர்வு முடிவுகளில் குளறுபடிகள் ஏற்பட்டுள்ளதாகச் சமூக ஊடகங்களிலும், தேர்வர்கள் மத்தியிலும் எழுந்த இரு முக்கியப் புகார்களுக்கு ஆசிரியர் தேர்வு வாரியம் (TRB) அதிகாரப்பூர்வமாக விளக்கம் அளித்து முற்றுப்புள்ளி வைத்துள்ளது.

தேர்வு பின்னணி: தமிழகத்தில் உள்ள அரசு கல்லூரிகளில் காலியாக உள்ள 2,708 உதவி பேராசிரியர் பணியிடங்களை நிரப்புவதற்காக ஆசிரியர் தேர்வு வாரியம் மூலம் கடந்த 2025-ஆம் ஆண்டு டிசம்பர் 27-ஆம் தேதி எழுத்துத் தேர்வு நடத்தப்பட்டது. இந்தத் தேர்வை மாநிலம் முழுவதிலும் இருந்து சுமார் 42,064 தேர்வர்கள் எழுதினர். இதனைத் தொடர்ந்து, பலத்த எதிர்பார்ப்புகளுக்கு மத்தியில் இத்தேர்வுக்கான முடிவுகள் மற்றும் மதிப்பெண் பட்டியல்கள் கடந்த ஜூன் 25-ஆம் தேதி டிஆர்பி இணையதளத்தில் வெளியிடப்பட்டன.

புயல கிளப்பிய 2006 பிறந்த ஆண்டு சர்ச்சை: மதிப்பெண் பட்டியல் வெளியானதைத் தொடர்ந்து, அதில் பல்வேறு குளறுபடிகள் இருப்பதாகப் புகார்கள் வெடித்தன. குறிப்பாக, தகுதிப் பட்டியலில் இருந்த ஒரு தேர்வரின் பிறந்த ஆண்டு '2006' என்று குறிப்பிடப்பட்டிருந்தது. 20 வயது மட்டுமே நிரம்பிய ஒரு இளம் வயது நபர், எப்படி முதுநிலைப் படிப்பை (Post Graduation) முடித்து, அதற்குரிய தகுதித் தேர்வுகளையும் பாஸ் செய்துவிட்டு, உதவி பேராசிரியர் பணிக்கு எழுத முடியும் என்று பலரும் சமூக வலைதளங்களில் கேள்வி எழுப்பி, வாரியத்தின் நம்பகத்தன்மை மீது விமர்சனம் வைத்தனர்.

ஆசிரியர் தேர்வு வாரியத் தலைவரின் விளக்கம்: இந்தப் புகார்கள் குறித்துத் தெளிவுபடுத்தும் விதமாக, ஆசிரியர் தேர்வு வாரியத் தலைவர் எஸ்.ஜெயந்தி நேற்று வெளியிட்டுள்ள செய்திக்குறிப்பில் கூறியிருப்பதாவது:

• பிறந்த தேதி தவறு: இணையதளத்தில் 56 பாடங்கள் தொடர்பான மதிப்பெண் பட்டியல்கள் வெளியிடப்பட்டுள்ளன. அதில் சர்ச்சை கிளப்பிய அந்தத் குறிப்பிட்ட தேர்வர், தனது ஆன்லைன் விண்ணப்பத்தை நிரப்பும்போது, கவனக்குறைவாகத் தனது பிறந்த ஆண்டை 1991 என்பதற்குப் பதிலாக 2006 என்று தவறாகப் பதிவேற்றம் செய்துள்ளார். அவர் விண்ணப்பத்தில் குறிப்பிட்டிருந்த அதே தேதியின் அடிப்படையிலேயே மதிப்பெண் பட்டியலும் கணினியால் வெளியிடப்பட்டுள்ளது. இதில் வாரியத்தின் தவறு ஏதுமில்லை.

• பெயருக்குப் பதில் சான்றிதழ் எண்: இதேபோல், மற்றொரு தேர்வர் தனது விண்ணப்பத்தில் பெயரைக் குறிப்பிட வேண்டிய இடத்தில், தவறுதலாகத் தனது பத்தாம் வகுப்பு மதிப்பெண் சான்றிதழ் எண்ணைப் (10th Marksheet Number) பதிவேற்றம் செய்திருந்தார். பின்னர் தனது தவறை உணர்ந்த அவர், கடந்த டிசம்பர் 22-ஆம் தேதி தனது பெயரில் திருத்தம் செய்யக் கோரி வாரியத்திற்கு விண்ணப்பித்தார். அவரது விவரங்கள் சரிபார்க்கப்பட்டு, தேர்வு எழுதவும் அவர் அனுமதிக்கப்பட்டார். எனினும், கணினி தரவுப் புள்ளி மாற்றங்களுக்கு முன்பாகவே, அவர் முதலில் சமர்ப்பித்த பெயர் விவரங்களின் அடிப்படையிலேயே ஹால் டிக்கெட் வழங்கப்பட்டு, தேர்வு மதிப்பெண்ணும் தற்போது வெளியாகியுள்ளது.

இவ்வாறு ஆசிரியர் தேர்வு வாரியத் தலைவர் தனது விளக்கத்தில் தெரிவித்துள்ளார். இதன் மூலம் தொழில்நுட்பக் கோளாறோ அல்லது முறைகேடோ நடக்கவில்லை என்றும், தேர்வர்கள் விண்ணப்பிக்கும் போது செய்த தனிப்பட்ட தவறுகளே இந்த குழப்பத்திற்குக் காரணம் என்பதும் தெளிவாகியுள்ளது.