“70 டிஎம்சியில் அணை கட்டினால் தமிழகம் பாலைவனமாகும்!”: மேகேதாட்டு விவகாரத்தில் அன்புமணி ராமதாஸ் அதிரடி முழக்கம்!

“70 டிஎம்சியில் அணை கட்டினால் தமிழகம் பாலைவனமாகும்!”: மேகேதாட்டு விவகாரத்தில் அன்புமணி ராமதாஸ் அதிரடி முழக்கம்!

மேட்டூர்: “காவிரியின் குறுக்கே மேகேதாட்டு அணையே கட்டக்கூடாது எனும்போது, அதற்கு எதற்குத் தனியாக ஒரு நடுவர் மன்றம்? அணையே வேண்டாம் என்பதுதான் பாமகவின் தீர்க்கமான நிலைப்பாடு” என்று பாட்டாளி மக்கள் கட்சியின் தலைவர் மருத்துவர் அன்புமணி ராமதாஸ் தெரிவித்துள்ளார். காவிரியாற்றின் குறுக்கே மேகேதாட்டு பகுதியில் புதிய அணை கட்டும் முயற்சியில் கர்நாடக அரசு தீவிரமாக ஈடுபட்டு வருவதைக் கண்டித்து, பாமக சார்பில் மேட்டூரில் இன்று விழிப்புணர்வு நடைபயணம் மற்றும் பொதுக்கூட்டம் நடைபெற்றது. இப்பொதுக்கூட்டத்தில் கலந்துகொண்டு பேசிய அன்புமணி ராமதாஸ், மேகேதாட்டு அணை கட்டப்பட்டால் தமிழகத்தின் 5.5 கோடி மக்களுக்குக் குடிநீர் கிடைக்காமல் போகும் பேராபத்து உள்ளதாக எச்சரித்தார்.

தனது உரையில் காவிரியின் முக்கியத்துவம் மற்றும் கர்நாடகாவின் அணைகள் குறித்துப் பட்டியலிட்ட அன்புமணி, "தமிழகத்தில் உள்ள 38 மாவட்டங்களில் 28 மாவட்டங்கள் காவிரி நீரை நம்பித்தான் உள்ளன. காவிரி குண்டாறு திட்டம், ஒகேனக்கல் கூட்டுக் குடிநீர் திட்டம் உள்ளிட்ட பல்வேறு முக்கியத் திட்டங்களுக்குக் காவிரியே வாழ்வாதாரம். கர்நாடகாவில் ஏற்கனவே 4 பெரிய அணைகள் மூலம் 115 டிஎம்சி தண்ணீர் சேமிக்கப்படுகிறது; ஆனால், தமிழகத்தின் மேட்டூர் அணையில் 93 டிஎம்சி மட்டுமே சேமிக்க முடியும். இப்போது மேகேதாட்டுவில் அணை கட்டிவிட்டால் கர்நாடகா மேலும் 70 டிஎம்சி நீரைத் தன் வசம் சேமித்துக் கொள்ளும். பெங்களூரு நகரின் குடிநீர்த் தேவைக்கு வெறும் 5 டிஎம்சி தண்ணீரே போதுமானது எனும்போது, 70 டிஎம்சி கொள்ளளவில் அணை கட்டுவது தமிழகத்தைப் பாலைவனமாக்கும் சூழ்ச்சி" என்று குற்றம் சாட்டினார்.

தொடர்ந்து மத்திய அரசு மற்றும் தமிழக எதிர்க்கட்சியான திமுகவின் அணுகுமுறை குறித்தும் அவர் விமர்சனங்களை முன்வைத்தார். "மத்தியில் எந்தக் கட்சி ஆட்சிக்கு வந்தாலும் அவர்கள் கர்நாடக மாநிலத்திற்கு ஆதரவாகவே செயல்படுவார்கள்; ஏனெனில் அங்கு காங்கிரஸ், பாஜக ஆகிய இரண்டு கட்சிகளும்தான் மாறி மாறி ஆட்சி அதிகாரத்திற்கு வருகின்றன. அண்மையில் மேகேதாட்டு அணை தொடர்பாகத் தமிழகச் சட்டமன்றத்தில் தீர்மானம் கொண்டு வந்தபோது, எதிர்க்கட்சித் தலைவர் உதயநிதி ஸ்டாலின் ஒரு திருத்தத்தைக் கொண்டு வந்ததாகக் கூறினார்கள். அதில், மேகேதாட்டு விவகாரத்திற்கு நடுவர் மன்றம் அமைக்க வேண்டும் எனக் கோரியுள்ளனர். அணையே கட்டக்கூடாது என்கிற போது, நடுவர் மன்றம் எதற்கு என்பதுதான் எங்களின் கேள்வி" என்று சாடினார்.

மேலும், காவிரி நதிநீர் உரிமையை மீட்க இளைஞர்கள் பெருமளவில் முன்வர வேண்டும் என்று அழைப்பு விடுத்த அவர், "இன்றைய இளைஞர்கள் சோஷியல் மீடியா வழியாகப் பல அரசியல் மாற்றங்களைக் கொண்டு வருவது போல, மேகேதாட்டு அணை விவகாரத்திலும் விழிப்புணர்வை ஏற்படுத்த வேண்டும். ஜல்லிக்கட்டுப் போராட்டத்தைப் போல இந்த வாழ்வாதாரப் பிரச்சினையையும் இளைஞர்கள் கையில் எடுத்துப் போராட வேண்டும்" எனக் கேட்டுக்கொண்டார். பொதுக்கூட்டத்தைத் தொடர்ந்து, மேகேதாட்டு அணையினால் ஏற்படும் பாதிப்புகள் குறித்த விழிப்புணர்வுப் பிரசுரங்களைப் பொதுமக்களுக்கு வழங்கியபடி அன்புமணி ராமதாஸ் நடைபயணம் மேற்கொண்டார். இந்நிகழ்வில், அதிமுக எம்.எல்.ஏ வெங்கடாஜலம், பாமக முன்னாள் எம்.எல்.ஏ சதாசிவம் உட்பட அதிமுக மற்றும் பாமகவின் முக்கிய நிர்வாகிகள், ஏராளமான விவசாயிகள் கலந்துகொண்டனர்.