“54 நாட்களில் 151 பாலியல் வன்கொடுமைகள், 85 படுகொலைகள்” - தவெக அரசுக்கு எதிராக ஆளுநரிடம் அடுக்கடுக்கான புகார்களைப் பட்டியலிட்ட நயினார் நாகேந்திரன்!

“54 நாட்களில் 151 பாலியல் வன்கொடுமைகள், 85 படுகொலைகள்” - தவெக அரசுக்கு எதிராக ஆளுநரிடம் அடுக்கடுக்கான புகார்களைப் பட்டியலிட்ட நயினார் நாகேந்திரன்!

சென்னை: "தமிழகத்தில் தவெக ஆட்சிப் பொறுப்பேற்ற இந்த குறுகிய காலத்திற்குள் சட்டம் - ஒழுங்கு முற்றிலும் சீர்குலைந்துவிட்டது" என்று தமிழக பாஜக தலைவர் நயினார் நாகேந்திரன் மிகக் கடுமையான குற்றச்சாட்டுகளை முன்வைத்துள்ளார்.

தமிழக ஆளுநர் ராஜேந்திர அர்லேகரை, பாஜக மேலிடப் பொறுப்பாளர் அரவிந்த் மேனன் மற்றும் கட்சியின் மூத்த நிர்வாகி நாராயணன் திருப்பதி ஆகியோருடன் இன்று நேரில் சந்தித்த நயினார் நாகேந்திரன், தவெக அரசு மற்றும் அதன் அமைச்சர்களுக்கு எதிரான அடுக்கடுக்கான புகார்கள் அடங்கிய மனுவை அளித்தார்.

ஆளுநருடனான இந்தச் சந்திப்பிற்குப் பிறகு செய்தியாளர்களிடம் பேசிய நயினார் நாகேந்திரன் கூறியதன் விரிவான விவரம்:

சட்டம் - ஒழுங்கு சீர்குலைவு – வெள்ளை அறிக்கை கோரிக்கை: "தமிழகத்தில் புதிய ஆட்சிப் பொறுப்பேற்ற கடந்த 54 நாட்களில் மட்டும் 151 பாலியல் வன்கொடுமைகளும், 85-க்கும் மேற்பட்ட படுகொலைகளும், 80-க்கும் மேற்பட்ட போதைப்பொருள் கடத்தல் சம்பவங்களும் அரங்கேறியுள்ளன. தவெகவைச் சேர்ந்தவர்களே பல பாலியல் தொந்தரவுகள் உள்ளிட்ட குற்றச் செயல்களில் நேரடியாக ஈடுபடுகின்றனர். ஆனால், முதல்வர் விஜய் இதன் மீது எந்தவொரு நடவடிக்கையும் எடுக்காமல் மௌனம் காக்கிறார். கடந்த கால திமுக அரசுக்கும், இப்போதைய தவெக அரசுக்கும் சட்டம் - ஒழுங்கில் எந்த வித்தியாசமும் இல்லை. எல்லாவற்றுக்கும் வெள்ளை அறிக்கை கேட்கும் இந்த அரசு, தமிழகத்தின் தற்போதைய சட்டம் - ஒழுங்கு நிலைமை குறித்து உடனடியாக வெள்ளை அறிக்கை வெளியிட வேண்டும்."

அமைச்சர்கள் மீதான புகார்கள்: "உயர் கல்வித் துறை அமைச்சர் விஸ்வநாதன் குழந்தைகளிடம் நடந்து கொண்ட விதம் அநாகரிகமானது. அதேபோல், தவெகவின் அதிகாரப்பூர்வ அமைச்சரவைக் கூட்டத்தில் அரசு சாரா தனி நபர்களான விஷ்ணு ரெட்டியும், ஜான் ஆரோக்கியசாமியும் எப்படி கலந்து கொள்ள அனுமதிப்பார்கள்? இது அரசு ரகசியங்களை மீறும் செயல். இதுகுறித்தும் ஆளுநரிடம் புகார் அளித்துள்ளோம்."

சட்டத்துறை அமைச்சர் நிர்மல் குமார் மீது லஞ்சப் புகார்: "சட்டத்துறை அமைச்சர் நிர்மல் குமாருக்கு சட்டம் படித்துள்ளாரே தவிர, சட்டம் பற்றி ஏதேனும் தெரியுமா என்றே ஐயமாக உள்ளது. தமிழக அரசு வழக்கறிஞர்களை (Government Advocates) நியமிக்க ரூ.5 லட்சம் முதல் ரூ.50 லட்சம் வரை அமைச்சர் நிர்மல் குமார் லஞ்சம் கேட்பதாகப் புகார்கள் எழுந்துள்ளன.

மேலும், திருப்பரங்குன்றத்தில் தீபம் ஏற்ற வேண்டும் என்ற நீதிமன்றத் தீர்ப்பை 'நிறைவேற்ற மாட்டோம்' என இவர் பொதுவெளியில் பேசுகிறார். நீதிமன்ற உத்தரவையே மதிக்காத ஒருவர் எப்படி சட்டத்துறை அமைச்சராக நீடிக்க முடியும்? ஆளுநருக்கு ஆய்வு செய்ய உரிமை இல்லை என்று கூறும் அமைச்சர், அரசியலமைப்புச் சட்டம் 167-ன் கீழ் ஆளுநருக்கு உள்ள அதிகாரங்களை முதலில் படித்துப் பார்க்க வேண்டும். அரசு தயாரித்துக் கொடுத்த உரையை அப்படியே வாசித்த ஆளுநரை, தேவையின்றி அமைச்சர்கள் கொச்சைப்படுத்துவது அழகல்ல."

தவெகவின் குதிரை பேரம்: "தவெக அரசு குதிரை பேரத்தில் ஈடுபடுவதில் எவ்வித சந்தேகமும் இல்லை. ஆட்சிப் பொறுப்பை ஏற்கும் முன்னரே அமமுக எம்.எல்.ஏ காமராஜை குதிரை பேரம் மூலம் தங்கள் பக்கம் இழுத்தார்கள். இப்போது தொடர்ந்து பிற கட்சி எம்.எல்.ஏ-க்களும் தவெக பக்கம் சென்று கொண்டிருக்கிறார்கள். புதிய ஆட்சி அமைந்து வெறும் 54 நாட்களிலேயே இடைத்தேர்தல் வர வேண்டிய அவசியம் என்ன?" என்று தமிழக பாஜக தலைவர் நயினார் நாகேந்திரன் அடுக்கடுக்கான கேள்விகளை எழுப்பியுள்ளார்.

செய்திப் பின்னணி: தமிழகத்தில் தவெக ஆட்சி அமைந்த பிறகு, சட்டம் - ஒழுங்கு பிரச்சினை மற்றும் அமைச்சர்களின் செயல்பாடுகளை முன்வைத்து எதிர்க்கட்சியான பா.ஜ.க ஆளுநரைச் சந்தித்து அதிகாரப்பூர்வமாகப் புகார் அளித்திருப்பது அரசியல் வட்டாரத்தில் பெரும் பரபரப்பை ஏற்படுத்தியுள்ளது.