மத்திய அரசின் புதிய இபிஎஃப் திட்டம் 2026 அறிமுகம்: பி.எஃப் கட்டாய பங்களிப்பு ரூ.1,800 ஆக நிர்ணயம்—பயனர்கள் விருப்பம் போல் கூடுதலாகச் செலுத்தலாம்!

மத்திய அரசின் புதிய இபிஎஃப் திட்டம் 2026 அறிமுகம்: பி.எஃப் கட்டாய பங்களிப்பு ரூ.1,800 ஆக நிர்ணயம்—பயனர்கள் விருப்பம் போல் கூடுதலாகச் செலுத்தலாம்!

புதுடெல்லி: மத்திய அரசு, தொழிலாளர்களின் நிதிப் பாதுகாப்பு மற்றும் சேமிப்பை எளிதாக்கும் நோக்கில் "ஊழியர் வருங்கால வைப்பு நிதி (EPF) திட்டம் 2026"-ஐப் புதிதாக அறிவித்துள்ளது. இந்த புதிய விதிகளின்படி, ஊழியர்களுக்கான கட்டாய பி.எஃப் பங்களிப்புத் தொகையில் மிக முக்கிய மாற்றங்கள் கொண்டுவரப்பட்டுள்ளதுடன், பி.எஃப் கணக்கில் இருந்து முன்பணம் (Advance) எடுக்கும் வழிமுறைகளும் பெருமளவில் எளிமையாக்கப்பட்டுள்ளன.

புதிய இபிஎஃப் (EPF) விதிகளின்படி, ஊழியர்களுக்கான அடிப்படை மாதச் சம்பள வரம்பு ரூ.15,000 ஆக நிர்ணயிக்கப்பட்டுள்ளது. இதன் அடிப்படையில் பிடிக்கப்படும் 12 சதவீதத் தொகையான ரூ.1,800 மட்டுமே இனி ஊழியர்களின் தரப்பிலிருந்து "கட்டாயப் பங்களிப்பாக" இருக்கும். உதாரணமாக, ஒரு ஊழியரின் மாதச் சம்பளம் ரூ.1 லட்சமாக இருந்தாலும், அவரின் கட்டாய இபிஎஃப் பிடித்தம் ரூ.1,800 மட்டுமே ஆகும். எனினும், எஞ்சிய தொகையைத் தங்களின் ஓய்வூதியச் சேமிப்பிற்காகக் கூடுதலாகச் செலுத்த விரும்பும் ஊழியர்கள், தங்களின் சொந்த விருப்பத்தின் அடிப்படையில் எவ்வளவு வேண்டுமானாலும் கூடுதலாகச் செலுத்திக் கொள்ளலாம்.

நிறுவனங்களுக்கான விதிவிலக்கு மற்றும் கூடுதல் சுதந்திரம்:

ஊழியர்கள் தங்களின் விருப்பத்தின் பேரில் கூடுதல் தொகையைச் செலுத்தினால், அதற்கு இணையாக நிறுவனங்களும் (Companies) கூடுதல் தொகையைச் செலுத்த வேண்டும் என்கிற கட்டாயம் புதிய விதியில் இல்லை. நிறுவனங்கள் விரும்பினால் மட்டுமே தங்களின் பங்களிப்பைக் கூட்டலாம். மேலும், இந்த கூடுதல் பங்களிப்புத் தொகையை ஊழியர்களும், நிறுவனங்களும் தங்களுக்குத் தேவைப்படும்போது எப்போது வேண்டுமானாலும் குறைத்துக்கொள்ளவோ அல்லது முற்றிலுமாக நிறுத்திக்கொள்ளவோ முழு சுதந்திரம் அளிக்கப்பட்டுள்ளது.

முன்பணம் எடுக்கும் நடைமுறைகள் எளிமையாக்கல்:

இதற்கு முன்னதாக இபிஎஃப் கணக்கில் இருந்து அவசரத் தேவைகளுக்காக முன்பொகை (Advance) எடுப்பதற்கு 13 சிக்கலான பிரிவுகள் இருந்தன. தற்போது அவை எளிமையாக்கப்பட்டு 3 முக்கிய பிரிவுகளாகக் குறைக்கப்பட்டுள்ளன. அதன்படி:

1. அத்தியாவசியத் தேவைகள்: மருத்துவம், உயர்கல்வி மற்றும் திருமணம்.

2. வீட்டுத் தேவைகள்: சொந்தமாக வீடு கட்டுதல் அல்லது புதிய வீடு வாங்குதல்.

3. சிறப்புச் சூழ்நிலைகள்: எதிர்பாராத அவசரக் காலச் சூழல்கள்.

இப்பிரிவுகளின் கீழ் ஊழியர்கள் மிக எளிதாகத் தங்களுக்குத் தேவையான பணத்தைப் பெற்றுக் கொள்ளலாம். ஊழியர்கள் தங்களின் பிஎஃப் கணக்கில் இருக்கும் தகுதியான தொகையில் 100 சதவீதம் வரை முன்பொகையாக எடுக்க அனுமதிக்கப்படுவர். இருப்பினும், எதிர்கால மற்றும் அவசரக் காலத் தேவைகளைக் கருதி, கணக்கில் எப்போதும் குறைந்தபட்சம் 25 சதவீதத் தொகையை இருப்பாக (Minimum Balance) வைத்திருக்க வேண்டும் என்பது கட்டாயமாக்கப்பட்டுள்ளது.

ஒப்பந்தத் தொழிலாளர்களுக்குப் பாதுகாப்பு:

புதிய திட்டத்தில் ஒப்பந்தத் தொழிலாளர்களின் (Contract Labourers) பிஎஃப் பங்களிப்பை உறுதி செய்யும் முழுப் பொறுப்பும் முதன்மை நிறுவனங்களிடமே (Principal Employers) ஒப்படைக்கப்பட்டுள்ளது. ஒப்பந்ததாரர் (Contractor) தனியாகப் பதிவு செய்யாத பட்சத்தில், தொழிலாளர்களுக்கான பிஎஃப் தொகையைச் சரியாகச் செலுத்துவதை முதன்மை நிறுவனமே நேரடியாகக் கண்காணிக்க வேண்டும் என்று இபிஎஃப்ஓ (EPFO) புதிய விதிகளில் திட்டவட்டமாகத் தெரிவிக்கப்பட்டுள்ளது. இந்த புதிய சீர்திருத்தங்கள் தனியார் துறை ஊழியர்களிடையே பெரும் வரவேற்பைப் பெற்றுள்ளன.