அயோத்தி ராமர் கோவிலில் ரூ.200 கோடி உண்டியல் காணிக்கை மோசடி: அறக்கட்டளை நிர்வாகிகள் உட்பட 17 பேர் மீது அதிரடி வழக்குப்பதிவு!
அயோத்தி: உத்தரப் பிரதேச மாநிலம் அயோத்தியில் உள்ள புகழ்பெற்ற ராமர் கோவிலில், பக்தர்கள் செலுத்திய உண்டியல் காணிக்கைப் பணத்தில் சுமார் 200 கோடி ரூபாய் வரை பிரம்மாண்ட மோசடி நடைபெற்றுள்ள அதிர்ச்சித் தகவல் வெளியாகியுள்ளது. இச்சம்பவம் நாடு முழுவதும் பெரும் பரபரப்பை ஏற்படுத்தியுள்ளதோடு, மத்தியில் ஆளும் பா.ஜ.க மற்றும் உத்தரப் பிரதேச மாநில யோகி ஆதித்யநாத் அரசுக்குக் கடுமையான அரசியல் நெருக்கடியையும் ஏற்படுத்தியுள்ளது.
சிறப்பு விசாரணை குழுவின் (SIT) திடுக்கிடும் அறிக்கை
கடந்த 2024-ஆம் ஆண்டு ஜனவரி 22-ஆம் தேதி பிரதமர் நரேந்திர மோடியால் முறைப்படி திறந்து வைக்கப்பட்ட அயோத்தி ராமர் கோவிலில், காணிக்கை மற்றும் நன்கொடை நிதியில் முறைகேடு நடப்பதாகப் புகார்கள் எழுந்தன. இதனையடுத்து, இந்த விவகாரத்தை விசாரிக்க உத்தரப் பிரதேச அரசால் அமைக்கப்பட்ட 'சிறப்பு விசாரணை குழு' (SIT), தனது 20 பக்க முதற்கட்ட விசாரணை அறிக்கையைத் தற்போது சமர்ப்பித்துள்ளது.
அந்த அறிக்கையின்படி, முதற்கட்ட மதிப்பீடுகளின் அடிப்படையில் பக்தர்கள் செலுத்திய காணிக்கைப் பணத்தில் சுமார் ரூ.200 கோடி வரை முறைகேடு செய்யப்பட்டுள்ளது உறுதி செய்யப்பட்டுள்ளது.
மாட்டுச் சாணத்தில் ஒளித்து வைக்கப்பட்ட லட்சங்கள்: ஊழியர்களின் அசுர வளர்ச்சி
காவல்துறையினரின் தீவிர விசாரணையில் இந்த மோசடி குறித்துப் பல்வேறு திடுக்கிடும் பின்னணிகள் வெளிச்சத்திற்கு வந்துள்ளன:
பாதுகாப்பு குறைபாடுகள்: கோவிலின் உண்டியல் காணிக்கை எண்ணும் பணியில் ஈடுபட்ட தனியார் ஊழியர்களுக்கு முறையான சீருடைகளோ, உடற்பரிசோதனைகளோ மற்றும் முறையான பாதுகாப்பு விதிமுறைகளோ அறக்கட்டளை தரப்பால் பின்பற்றப்படவில்லை என்பது தெரியவந்துள்ளது.
சொத்து குவிப்பு: வெறும் ரூ.15,000 முதல் ரூ.20,000 வரை மட்டுமே மாத சம்பளம் வாங்கும் சாதாரண தற்காலிக ஊழியர்கள் சிலர், வேலைக்குச் சேர்ந்த சில மாதங்களிலேயே ரூ.40 லட்சம் முதல் ரூ.1.5 கோடி மதிப்பிலான நிலங்களை அசுர வேகத்தில் வாங்கியதை எஸ்டிஐ (SIT) அதிகாரிகள் கண்டுபிடித்துள்ளனர்.
சாண குவியலில் பணம்: குற்றம் சாட்டப்பட்ட லவ்குஷ் மிஸ்ரா போன்ற முக்கிய ஊழியர்களின் வீடுகளில் நடத்தப்பட்ட அதிரடிச் சோதனையில், மாட்டுச் சாணக் குவியலுக்குள் ரகசியமாக மறைத்து வைக்கப்பட்டிருந்த லட்சக்கணக்கான ரூபாய் ரொக்கம் மற்றும் தங்கம் உட்பட இதுவரை சுமார் ரூ.2 கோடி மதிப்பிலான சொத்துக்கள் பறிமுதல் செய்யப்பட்டுள்ளன.
அறக்கட்டளை நிர்வாகிகள் மீது பாய்ந்த வழக்கு
இந்த மெகா திருட்டு வழக்கில், ஸ்ரீராம் ஜென்மபூமி தீர்த்த க்ஷேத்ரா அறக்கட்டளையின் மூத்த அதிகாரிகள், முக்கிய நிர்வாகிகள் மற்றும் ஊழியர்கள் உட்பட மொத்தம் 17 பேரைச் சிறப்பு விசாரணை குழு குற்றவாளிகளாகக் குறிப்பிட்டு வழக்குப் பதிவு செய்துள்ளது.
கோடிக்கணக்கான இந்துக்களின் நம்பிக்கையாகப் பார்க்கப்படும் அயோத்தி ராமர் கோவிலிலேயே இத்தகைய பிரம்மாண்டப் பண மோசடி அரங்கேறியிருப்பது, ஆன்மீக வாதிகள் மற்றும் பொதுமக்கள் மத்தியில் பெரும் அதிர்ச்சியை ஏற்படுத்தியுள்ளது. இது குறித்து போலீசார் தொடர்ந்து தீவிர விசாரணை நடத்தி வருகின்றனர்.
AthibAn Tv