“உதவிப் பேராசிரியர் தேர்வில் நடந்தது திட்டமிட்ட முறைகேடு; பணி நியமனங்களை நிறுத்தி வைக்க வேண்டும்” - விசிக தலைவர் திருமாவளவன் அதிரடி கோரிக்கை!

“உதவிப் பேராசிரியர் தேர்வில் நடந்தது திட்டமிட்ட முறைகேடு; பணி நியமனங்களை நிறுத்தி வைக்க வேண்டும்” - விசிக தலைவர் திருமாவளவன் அதிரடி கோரிக்கை!

சென்னை: தமிழக அரசு கலை மற்றும் அறிவியல் கல்லூரிகளுக்கான உதவிப் பேராசிரியர் போட்டித் தேர்வுகளில் பெரிய அளவில் திட்டமிட்ட முறைகேடுகள் நடந்துள்ளதாக வலுவான சந்தேகம் எழுந்துள்ளதால், இதுகுறித்து அரசு உடனடியாக விசாரணை நடத்த வேண்டும் என்றும், அதுவரை பணி நியமன நடைமுறைகளை நிறுத்தி வைக்க வேண்டும் என்றும் விசிக தலைவர் தொல். திருமாவளவன் வலியுறுத்தியுள்ளார்.

பல்லாயிரக்கணக்கான தேர்வர்களின் நம்பிக்கை சிதைவு:

இது குறித்து விசிக தலைவர் தொல். திருமாவளவன் தனது அதிகாரபூர்வ சமூக வலைதளப் பக்கத்தில் வெளியிட்டுள்ள அறிக்கையில் கூறியிருப்பதாவது:

"அரசு கலை, அறிவியல் மற்றும் கல்வியியல் கல்லூரிகளில் காலியாக இருந்த 2,708 உதவிப் பேராசிரியர் பணியிடங்களை நிரப்புவதற்காக, ஆசிரியர் தேர்வு வாரியம் (TRB) கடந்த 2025-ம் ஆண்டு டிசம்பர் மாதம் 27-ம் தேதி எழுத்துத் தேர்வை நடத்தியது. இந்தத் தேர்வின் முடிவுகள் அண்மையில் (2026 ஜூன் 25) வெளியானது. ஆனால், இந்த முடிவுகள் தேர்வு எழுதிய பல்லாயிரக்கணக்கான தகுதியான விண்ணப்பதாரர்களைப் பெரும் அதிர்ச்சியிலும் வேதனையிலும் ஆழ்த்தியுள்ளது."

பூஜ்ஜியமும் 49 மதிப்பெண்களும் - அடுக்கடுக்கான சந்தேகங்கள்:

தேர்வு முடிவுகளில் உள்ள குளறுபடிகளைப் புள்ளிவிவரங்களுடன் சுட்டிக்காட்டியுள்ள திருமாவளவன், "இந்த உதவிப் பேராசிரியர் தேர்வு முடிவுகளில் முறைகேடுகள் நடந்துள்ளன என்பதற்கு தேர்வர்கள் பெற்றுள்ள மதிப்பெண்களே முதன்மைச் சான்றாக உள்ளன.

• உதாரணமாக: தமிழ் - முதல் தாளில் ஒருவர் 150-க்கு 111 மதிப்பெண்களைப் பெற்றிருக்கிறார். ஆனால், அதே நபர் தமிழ் - இரண்டாம் தாளில் 50-க்கு பூஜ்ஜியம் (0) மட்டுமே பெற்றுள்ளதாகக் குறிப்பிடப்பட்டுள்ளது.

• மற்றொரு குளறுபடி: வேறொரு தேர்வர் தமிழ் - முதல் தாளில் 150-க்கு வெறும் 54 மதிப்பெண்கள் மட்டுமே பெற்றுள்ள நிலையில், இரண்டாம் தாளில் 50-க்கு 49 மதிப்பெண்கள் பெற்றுள்ளார்.

இதுபோல பல தேர்வர்களின் மதிப்பெண்களில் விசித்திரமான குளறுபடிகள் நடந்துள்ளன. நெட், செட் (NET / SET) தேர்ச்சி பெற்று, முனைவர் பட்டம் (Ph.D) வாங்கிய பேராசிரியர்களா இரண்டாம் தாளில் பூஜ்ஜியம் வாங்கும் அளவுக்குத் தகுதியற்று இருப்பார்கள்? இது எவராலும் நம்பக் கூடிய ஒன்றாக இல்லை. எனவே, தேர்வுத் தாள்களை மதிப்பீடு செய்ததில் மிகப்பெரிய முறைகேடுகள் நடந்துள்ளன என்கிற வலுவான ஐயத்தை இது உருவாக்கியுள்ளது" எனச் சாடியுள்ளார்.

"திட்டமிட்ட சதி" - விசிக தலைவர் காட்டம்:

"இந்த விவகாரம் ஏதோ தற்செயலாகவோ அல்லது உள்நோக்கமின்றியோ நடந்த ஒரு சாதாரண நிர்வாகக் குளறுபடியாகத் தோன்றவில்லை; மாறாக, ஒரு குறிப்பிட்ட தரப்பினருக்குச் சாதகமாகத் திட்டமிட்டுச் செய்யப்பட்ட முறைகேடாகவே தோன்றுகிறது. இந்தத் தேர்வுகள் மிகவும் நியாயமான முறையில் நடத்தப்படும் என்று முழு நம்பிக்கை வைத்துப் பல்லாயிரக் கணக்கான இளைஞர்கள் எழுதியுள்ளனர். ஆனால், தற்போது அவர்களின் ஒட்டுமொத்த நம்பிக்கையும் சிதைக்கப்பட்டுள்ளது. இதன் காரணமாக இந்தத் தேர்வு முடிவுகளை முழுமையாக ரத்து செய்ய வேண்டும் என்கிற கோரிக்கையும் தேர்வர்கள் மத்தியில் வலுப்பெற்று வருகிறது.

எனவே, தமிழக அரசு உடனடியாக இந்த விவகாரத்தில் தலையிட்டு, ஆசிரியர் தேர்வு வாரியத்தின் இந்த மதிப்பீட்டு நடைமுறைகள் குறித்து உரிய விரிவான விசாரணை நடத்திட ஆணையிட வேண்டும். அந்த விசாரணை முழுமையாக முடிந்து உண்மை வெளிவரும் வரை, உதவிப் பேராசிரியர் பணி நியமனத்திற்கான அடுத்தகட்ட கவுன்சிலிங் உள்ளிட்ட நடைமுறைகளை நிறுத்தி வைக்க வேண்டும். இதன் மூலம் பாதிக்கப்பட்ட தகுதியான தேர்வர்கள் அனைவருக்கும் நீதி கிடைத்திட அரசு உரிய நடவடிக்கைகளை விரைந்து மேற்கொள்ள வேண்டும்" என்று திருமாவளவன் தமிழக அரசுக்கு வேண்டுகோள் விடுத்துள்ளார்.