ரூ.20 கோடி மெகா மோசடி: பெண் காவல் ஆய்வாளர் உட்பட 3 பேர் கைது; காவலர்கள் முதல் எஸ்.பி வரை பணத்தை இழந்து தவிப்பு!

ரூ.20 கோடி மெகா மோசடி: பெண் காவல் ஆய்வாளர் உட்பட 3 பேர் கைது; காவலர்கள் முதல் எஸ்.பி வரை பணத்தை இழந்து தவிப்பு!

சென்னை: குறைந்த விலையில் தங்கக் காசுகள் மற்றும் மலிவு விலையில் வீட்டுமனைகள் வாங்கித் தருவதாகக் கூறி சுமார் 20 கோடி ரூபாய் வரை மோசடி செய்த வழக்கில், பெண் காவல் ஆய்வாளர் ஷீலா மேரி உட்பட மேலும் 3 பேரைப் பொருளாதாரக் குற்றப்பிரிவு (EOW) போலீஸார் அதிரடியாகக் கைது செய்துள்ளனர். சென்னை ராயபுரம் அனைத்து மகளிர் காவல் நிலையத்தில் ஆய்வாளராகப் பணியாற்றி வந்த ஷீலா மேரியின் கார் ஓட்டுநரும், உறவினருமான பிரபுமணி என்பவர் கொடுங்கையூர் எம்.ஆர்.நகரில் நடத்தி வந்த தனியார் நிதி நிறுவனம் மூலமாக இந்த இமாலய மோசடி அரங்கேறியுள்ளது.

இந்த நிறுவனத்தின் மூலம் தங்கத்தில் முதலீடு செய்தால் அதிக லாபம் கிடைக்கும், மலிவு விலையில் வீட்டுமனைகள் பெற்றுத் தரப்படும் எனப் பல்வேறு கவர்ச்சிகரமான திட்டங்களை அறிவித்துப் பொதுமக்களிடம் கோடிக்கணக்கில் பணம் வசூலிக்கப்பட்டுள்ளது. முதலீட்டாளர்களின் நம்பிக்கையைப் பெறுவதற்காக, ஆய்வாளர் ஷீலா மேரி தனது அதிகாரப்பூர்வ காவல்துறை வாகனத்திலேயே சென்று முதலீட்டாளர்களைச் சந்தித்துத் தங்கக் காசுகளை வழங்கி வந்துள்ளார். இதனால் பொதுமக்களுடன் சேர்ந்து, காவல்துறையைச் சேர்ந்த காவலர்கள் முதல் எஸ்.பி (SP) அந்தஸ்திலான உயர் அதிகாரிகள் வரை தங்களது பணத்தை நம்பி முதலீடு செய்து தற்போது ஏமாந்து நிற்கின்றனர்.

தலைமறைவாக இருந்த பெண் ஆய்வாளர்: முன்ஜாமீன் தள்ளுபடியான நிலையில் அதிரடி கைது!

கடந்த 2024-ஆம் ஆண்டு இறுதியில், தங்கக் காசு வியாபாரி தன்னை ஏமாற்றிவிட்டதாகக் கூறி நிறுவனத்தை மூடிவிட்டு பிரபுமணி திடீரென தலைமறைவானார். முதற்கட்டமாக 56 முதலீட்டாளர்கள் அளித்த புகாரின் பேரில் ரூ.8.17 கோடி மோசடி எனத் தொடங்கப்பட்ட இந்த வழக்கின் மொத்த மோசடித் தொகை தற்போது 20 கோடி ரூபாயைத் தாண்டியிருக்கலாம் எனக் கூறப்படுகிறது. கடந்த மாதம் 9-ஆம் தேதி பிரபுமணி கைது செய்யப்பட்ட நிலையில், அவரிடம் நடத்திய விசாரணையில் ஆய்வாளர் ஷீலா மேரிக்கு இதில் உள்ள நேரடித் தொடர்பு உறுதியானது. இதையடுத்து சென்னை காவல் ஆணையர் உத்தரவின் பேரில் ஷீலா மேரி சஸ்பெண்ட் செய்யப்பட்டார்.

கைதுக்கு அஞ்சி சென்னை உயர் நீதிமன்றத்தில் ஷீலா மேரி தாக்கல் செய்த முன்ஜாமீன் மனு தள்ளுபடி செய்யப்பட்டதைத் தொடர்ந்து, பொருளாதாரக் குற்றப்பிரிவு போலீஸார் அவரை அதிரடியாகக் கைது செய்தனர். அவருடன் சேர்ந்து நிறுவன நிர்வாகிகளாகச் செயல்பட்ட செந்தில்குமார் (41), கல்பனா (31) ஆகியோரும் கைது செய்யப்பட்டுள்ளனர். கைதான ஷீலா மேரிக்குத் தமிழகத்தின் பல்வேறு மாவட்டங்களில் திருமண மண்டபங்கள், கல்குவாரிகள், நிலங்கள் இருப்பது கண்டறியப்பட்டு, அவை மோசடிப் பணத்தில் வாங்கப்பட்டதா என்ற கோணத்தில் விசாரணை முடுக்கிவிடப்பட்டுள்ளது.

பொருளாதாரக் குற்றப்பிரிவு அறிவிப்பு: இந்த நிறுவனத்தில் முதலீடு செய்து ஏமாந்த பொதுமக்கள் மற்றும் காவலர்கள் சென்னை அசோக் நகரில் உள்ள பொருளாதாரக் குற்றப்பிரிவு அலுவலகத்தை அணுகி தாராளமாகப் புகார் அளிக்கலாம். மேலும், இதுதொடர்பான புகார்களுக்கு:

• காவல் ஆய்வாளர் நசீமா: 98409 58356

• கட்டணமில்லா உதவி எண்: 1800-599-0050

• தொலைபேசி எண்: 044-22504332 ஆகிய எண்களைத் தொடர்பு கொள்ளலாம் என அறிவிக்கப்பட்டுள்ளது.